وەسێدارەدان.. پەردە لەبان تاوانیگ دڵتەزن لە کوەیت داوەزنێد
لەبان سۆشیال میدیا، پارچە ڤیدیۆیگ بڵاو کریا، نشان تاوانکارەگە دەێد، هەنای ئەو دویەتە رفنێد، و یەکیگ لە خانەوادەگەی هاوار کەێد.
فەرەح، ئەو دویەتە لە یەکیگ لە رووژەیل رەمەزان ٢٠٢١ هەنای وەگەرد دویەت خوەی و برازای بوی لەناو ماشینەگە، کەفتە وەر رفیان وەدەس کابرایگ، و ئیجا وەچەقوو دادەلی.
لە دادگا، تاوانکارەگە تەقەلا دا خوەی لەژیر تاوانەگە درارێد، و وت: دویەتەگە چەقوو دراوردیە و خوەی کوشتیە.
وەلێ وەگەرد لێکۆڵینەوە، تاوانکارەگە ناچار بوی راسیەگە ئاشکرا بکەێد، ک خوەی وە چەقوو داگەسە قوربانیەگە، چوینکە دویەتەگە رازی نەویە شوی وەپی بکەێد، و یەیش بیزار بویە ک دویەتەگە پەیوەندی وەگەردی نەکردگە، و هەمیش دویەتەگە واز لەو سکاڵایلە نەهاوردیە ک لەبانی تووماریان کردیە.
تاوانکارەگە ئاشکرا کردیە ک ئامێر وەشوینکەفتن لەقەی ماشینەگەی نایە، تا وەڕی مانگ دەسکرت شوینی بکەێدە دی، و رووژ تاوانەگە وەگەرد دویت و برازای لەناو ماشینەگەی بوینە و ئەرا ساڵۆن ژنانە چینە.
توومەتبارگە هاتیە ری لەلی بگرێد، و خوەشکەگەی وە ماشین خوەی (جێب چەرمگ) رەسیەسە هانای، وەلێ تاوانکارەگە داگەسە ماشینەگەی، ئیجا دویەتەگە لەناو ماشین (سیدان)ی دراوردیە و رفانیەسەی.
تاوانکارەگە وتیش: ماشین خوەی (پیکاب سیا) لەناو ریەگە وەجی هیشتیە، و سوار ماشین قوربانیەگە بویە، و رانیەسەی، و لەبان ریەگە، لە ناوچەی عدان، هەر لەور چەو دوو مناڵەگە، چەقوویگ داگەسە سینەی، و دویای ئەوە تواستیە بڕەسێدە فریاکەفتنی ک ئەو مەوقە دویەتەگە هیمان زنی بویە، باوجی لە خەسەخانە گیانی لەدەسدا.
تاوانکارەگە، واز لە ماشین قوربانیەگە هاورد، و وەتەکسی رەسیە ماڵ کەسوکاریگی لە ناوچەی رقە، و پڕتاڵی ئاڵشت کرد، و چیە لەناو هوتێلیگ لە ناوچەی حەولی خوەی بشارێدەو، تا شوینەگەی کریا دی، و پڕتاڵەیلی لە ناوچەی رقە پەیا کریان، ک وە خوین دویەتەگە پلگیانە.
