هندستان.. کوشیان و زەخمداربۊن نزیکەی 20 کەس لەناو پەرستگەیگ
شەفەق نیوز- نیودەلهی
رۊداو دەڵەکدانیگ لەناو پەرستگەی ئەشۆکدام لە ناوچەی لاکیسارای لە ویلایەت بیهار هندی، ئمڕوو دوشەممە، بۊە مدوو گیانلەدەسداین 7 کەس لەلای کەمەو و زەخمداربۊن زیاتر لە 12 کەس.
رووژنامەیگ هندی خەوەر دا کە رۊداوەگە لە ریوڕەسمیگ حەج ئایینی جەماوەری رۊ داگە، کە نزیکەی 50 هەزار کەس ئامادەی بۊنە، و زیایبۊن تونیگ لە شمارەی حەجیەیل گریەدریەێد وە رەسین دوو قەتار لە یەک وەخت.
سەرۆک وەڕێوەبەرایەتی ناوچەی لاکیسارای، شایلێندرا کومار، دیاری کرد، کە وە مدوو رشیان خەڵکەگە، تەیمانیگ لە یەکیگ لە بەشەیل شکیا، و دۊای ئەوە خەڵکەگە دەس کردنە کەفتنە وەبان یەکتری.
هەرلیوا خەوەر دریاگە لە کەفتن ستۊنیگ کارەبا یا تەلیگ و تۊشبۊن خەڵک وە تەزیان کارەبایی، وەلی ئی یاسایلە تا ئیسە وە شیوەیگ فەرمی دووپات نەکریانە. دەسەڵاتەیل وەردەوامن لە دڵنیابۊن لە هۊردەکارییەیل رۊداوەگە.
