هشکەساڵی سەختیگ یەک مەلیۆن کەس لە سۆماڵ بار کەێد
شەفەق نیوز/ کۆمسیۆن باڵای باوەت کووچبەرەیل و ئەنجومەن نەرویجی ئەرا کووچبەرەیل، ئمڕوو پەنجشەممە، خەوەردا لە بارکردن یەک مەلیۆن سۆماڵی لەوەر هشکەساڵی سەختیگ ئەو وڵات ئەفریقاییە گردیەسە وەر.
کۆمسیۆنەگە دیاری کرد ک زیاتر لە ٧٥٥ هەزار کەس لەی ساڵە لەناو سۆماڵ ئاوارە بوینە، لەوەر ئەو هشکەساڵیە.
وەیەوە، شمارەی ئاوارەیل لە کانوون دویەم ٢٠٢١ تا ئیسە ک وەرز هشکەساڵیە سەختەگە دەسوەپی کردیە رەسیە یەک مەلیۆن کەس.
سەرۆک ئەنجومەن نەرویجی ئەرا کووچبەرەیل لە سۆماڵ، محمد عەبدی، لە بەیاننامیگ وت، شمارەی یەک مەلیۆن کەس جویر زەنگیگ هووشداریە ئەرا سۆماڵ.
وتیش: ورسگی سای خوەی لەبان گشت وڵاتەگە داگرێد، و نووڕیمن خیزانەیل فرەیگ ناچار بوون گشت چشتیگ بیلنەجی چوینکە نە ئاو نە خوەراک لە ئاوایەیلیان مەنیە، و زیایکردن هاوکاری دارایی فرە گرنگە وەرجەیگ وەختەگە لەدەس بچوود .
سۆماڵ یە دوو ساڵە هشکەساڵییگ وەخوەی دوینێد ک یە چل ساڵە نەویە.
مەزەنە هەس شمارەی ئەو کەسەیلە ک زیان لە کەمی تیژیگ لە ئاسایش خوەراک وەخوەیان دوینن بڕەسێدە پەنج تا هەفت مەلیۆن سۆماڵی وەماوەی شەش مانگ بانان.
