هەناردەیل نەفت خوەرهەڵات ناوڕاس لە ئاستەیل وەرجە بەسانن هورمز رەد کەن

شەفەق نیوز- خوەرهەڵات ناوڕاس

داتایەیل بارکردن رووژ دووشەممە نیشان دان، کە هەناردەیل نەفت خاو لە خوەرهەڵات ناوڕاسەو لە ئاستەیل وەرجە جەنگ رەد کردنە ماوەی هەفتەی دۊایین لە ئەیلول/ سێپتەمبەر گوزەشتە، سەرەڕای وەردەوامبۊن پەلامارەیل لەبان ئەو کەشتییەیلە کە لە تەنگەی هورمز رەد بوون.

وەپەی داتایەیل سەرەتایی لە کۆمپانیای کەپلەر ئەرا وەدۊاکەفتن کەشتییەیل، هەناردەیل خاو لە ناوەین 19.5 مەلیۆن و 22.5 مەلیۆن بەرمیل رووژانە لە 24 ئەیلول/ سێپتەمبەر، و لە ناوەین 27 و 29 لەلی، لە وەراورد وە ناوەنجییگ کە رەسیە 18 مەلیۆن بەرمیل رووژانە ماوەی ماوەگە لە ئازار/ مارس 2025 تا شوبات/ فێبرایەر گوزەشتە، وەرجە جەنگ ئەمریکی ئیسرائیلی لەبان ئیران.

 ناوەنجی هەناردەیل خاو ماوەی هەفت رووژ 18.5 مەلیۆن بەرمیل رووژانە لە یەکەم تشرین یەکەم/ ئۆکتۆبەر تومار کرد، لە وەختیگ ناوەنجی بارەیل خاو و بەرهەمە نەفتییەیل و کەرەستەیل کیمیایی و شلەیل نازی غازی رەسیە 22.4 مەلیۆن بەرمیل رووژانە لە هەفت رووژەگە کە لە 30 ئەیلول/ سێپتەمبەر کووتایی هات، هەمیش شمارەی بارەیل غاز سروشتی تواوەو کە لەڕی تەنگەی هورمزەو دەرچگنە لە ئەیلول/ سێپتەمبەر ئەرا بەرزترین ئاست مانگانە لە شوبات/ فێبرایەرەوە بەرزەو بۊ.

 ئی داتایەیلە ئەو کەشتییەیلە لەخوەی نیەگرێد کە شایەت لە تەنگەگە رەد بۊنە وەرد پەکخستن ئامێرەیل ناسانن ئۆتۆماتیکی ئەرا دۊرکەفتن لە چەودیاریکردن، و وەرجە جەنگ لە 28 شوبات/ فێبرایەر، تەنگەگە رووژانە پیشوازی لە نزیکەی 125 کەشتی بازرگانی گەورا کردیاد، کە نزیکەی 20% لە دابینکردنەیل جەهانی رووژانە ئەرا نەفت خاو و غاز سروشتی تواوەو گواستیادەو.

لە وەرانوەر یە، کۆمپانیای "ماریسکس" تایبەتمەن لە زانیارییەیل بارکردن وت کە پەلامارەیل لەبان نەفتهەڵگرەیل لە تەنگەی هورمز و دەورگردی وەردەوام بۊن، وەرد تومارکردن لەلای کەم هەفت رویداو، و  باس تویشهاتن نەفتهەڵگر کەپ "کازیمە 3" وە تەقەمەنییگ نادیار کرد لە یەکەم تشرین یەکەم/ ئۆکتۆبەر، کە بۊە مدوو هیزگردن ئاگریگ لەبانی، لە وەختیگ دیاری کرد کە ئەندامەیل تیمەگە هیچ زەرەدیگ وەپیان نەڕەسیە.

 کۆمپانیاگە وریاداری دا لەوەگ کە کەشتییە بازرگانییەیل ئیسە کەفنە وەر هەڕەشەیگ زیایبۊ، وە خستنەڕۊ ئەگەر ئەوەگ کە رخەگە پەیوەندیدار بوود وە بویین کەشتییەیل لەناو ناوچەیل دیاریکریاگیگ کە شایەت لەناوی مووشەکەیل وەدۊای نیشانەیل رادارە وەردەسەیل بکەفن، نەگ وە ئامانجگردن کەشتییەیل دیاریکریاگ وە خوەیان.