هێزەیل ئیسرائیلی تەقە کەن وەرەو پەیامنێر شەفەق نیوز و راگەیانکارەیل لە باشوور سووریا
شەفەق نیوز - دیمەشق
هێزەیل ئیسرائیلی، ئمڕوو دووشەممە، تەقە کردن وەرەو پەیامنێر ئاژانس شەفەق نیوز و شمارەیگ لە راگەیانکارەیل، لە وەخت بەڵگەدارکردن پێشێلکاری و جۊلەیل ئیسرائیلی لە هەردوگ ئاوایی بیر عەجەم و بریقە لە ریف قونەیتەرەی ناوڕاس، لە باشوور سووریا، وەبی رۊداین هیچ زەخمدارییگ.
پەیامنێر ئاژانس شەفەق نیوز وت، کە تەقەکردنەگە مەوقەیگ رویدا راگەیانکارەیل لە ناوچەگە بوین ئەرا بەڵگەدارکردن پێشێلکاری و جۊلەیل ئیسرائیلی.
پەیامنێرمان دیاری کرد کە شەوەکی ئمڕوو رۊوەرۊی وەدۊاکەفتن بۊە لەلایەن هێزەیل داگیرکەر ئیسرائیلییەو لە وەخت بەڵگەدارکردنی ئەرا ئەو پێشێلکاری و جۊلەیلە، هاووەخت وەرد فڕین فڕۆکەیگ بیفڕۆکەوان لەبانی.
لەی چوارچیوە، سەنەد هینداوی لە وەڕێوەبەرایەتی راگەیانن قونەیتەرە، ئەرا ئاژانس شەفەق نیوز وت کە تیم راگەیاننەگە، رۊوەرۊی تەقەکردنیگ راسەوخۆ بۊە لەلایەن هێزەیل ئیسرائیلییەو، لە مەوقەی بۊینی لە ئاوایی بریقە لە دەیشتایی قونەیتەرەی باشووری، وە ئامانج بەڵگەدارکردن پێشێلکارییەیل ئیسرائیلی و ئامادەکردن راپۆرتیگ لەباوەت ناڵین دانیشتگەیل.
هینداوی دیاری کرد کە ئی رۊداوە نیشاندەر ئەو رخبارییەیلەسە کە رۊوەرۊی تیمەیل راگەیانن بوون لە مەوقەی کار مەیدانییان، وە داواکردن لە دامەزراوەیل راگەیانن و یەکێتییەیل رووژنامەوانی و رێکخراوەیل ناودەوڵەتی، و لە نوایان یەکێتی ناودەوڵەتی ئەرا رووژنامەنووسەیل، وە جۊلەکردن ئەرا مسۆگەرکردن پاراستن رووژنامەنووسەیل لە قونەیتەرە و باشوور سووریا، و مسۆگەرکردن بیوەییان لە وەخت جیوەجیکردن کاریان.
لە وەختیگ زۊتر، پەیامنێر ئاژانس شەفەق نیوز خەوەر دا، کە ناوچەیلیگ لە دەیشتایی درعا و قونەیتەرە لە باشوور سووریا شەو یەکشەممە جۊلەیل سەربازی ئیسرائیلی وەخوەیان دین کە هاتن وەناو هشکانی و تەقانن دەیان بومب رووشنایی لەخوەی گرد، هاووەخت وەرد فڕین فڕۆکەیل چەودیاریکردن و بیفڕۆکەوان لە ئاسمان ناوچەگە.
