نەفت داوەزێد وگەەرد ئەگەر زیایبۊن دابینکردنەیل رووسی دۊای بڕیار ترەمپ

شەفەق نیوز - وەدۊاچگن

نرخەیل نەفت، رووژ دوشەممە، داوەزیان توومار کردن دۊای بڕیار دۆناڵد ترەمپ سەرۆک ئەمریکی وە هەڵپەساردن سزایەیل و رسوومات گومرگی چەسپیاگ لەبان رووسیا، لە گامیگ کە شایەت ری خوەش بکەێد ئەرا زیایبۊن هەناردەیل سزەمەنی رووسی.

و گریەبەسەیل ئایندەیی خاو برێنت وە بڕ 1.94 دۆلار، یا 1.77%، ئەرا 107.92 دۆلار ئەرا هەر بەرمیلیگ داوەزین، لە وەختیگ خاو خوەرئاوا تەکساس ناوەندی ئەمریکی 83 سەنت، یا 0.82%، ئەرا 100.58 دۆلار ئەرا هەر بەرمیلیگ داوەزیا.

 ترەمپ، رووژ جمعە، واژوو لەبان فەرمانیگ جیوەجیکاری کرد ئەرا هەڵپەساردن سزایەیل و رسوومات گومرگی سەرەکی لەبان رووسیا، لە وەختیگ مارکۆ رۆبیۆ وەزیر دەیشتی وت کە سەرۆکەگە هەڵسەنگانن ئەرا شوینەوار ئابووری ئی ریکارەیلە کەێد لە ماوەیگ کە رەسێدە 60 رووژ.

 یەیش دۊای رێککەفتنیگ تیەێد لە ناوەین ترەمپ و ڤلادیمیر پوتین سەرۆک رووسی لەباوەت هەناردەکردن دیزڵ ئەرا ویلایەتە یەکگرتگەیل و وڵاتەیل ترەک، وە نزیکەی 2.3 ملیۆن بەرمیل لە ماوەی ئی مانگە، وە مەرجیگ بڕەیلە بەرزەو بوون ئەرا نزیکەی 7.6 ملیۆن بەرمیل لە مانگیگ، وەپەی راگەیانن ترەمپ.

لە وەرانوەر یەیش، ئاڵووزییەیل لە خوەرهەڵات ناوڕاس و پەلامارەیل لەبان کەشتییە بازرگانییەیل بەشداری کردن لە پاڵپشتیکردن نرخەیل، لەناو رخباریەیل لەباوەت بیوەیی بارهەڵگردن و دابینکردنەیل وزەی جەهانی.