نەفت بەرزەو بوود و لە 106 دۆلار رەد کەێد دۊای وسانن كڕ لۊلەیل سعودی "خوەرهەڵات - خوەرئاوا"
شەفەق نیوز - بەغداد / هەولێر
نرخەیل نەفت، ئمڕوو سێشەممە، بەرزەوبۊنیگ تومار کردن وەگەرد وەردەوامبۊن رخباریەیل لەباوەت شیویان دابینکردنەیل، دۊای ئەوەگ پەلامارەیل بان دامەزراوەیل وزە لە سعودیە بۊنە مدوو وسانن کڕ لۊلەیل خوەرەڵات و خوەرئاوا، هاوەخت وەگەرد پەلامارەیل نوویگ لەبان شانشینەگە.
گرێبەسە ئایەندەییەیل ئەرا خاو برێنت 1.24 دۆلار، یا 1.18 لە سەد، بەرزەو بۊن تا رەسیە 106.93 دۆلار ئەرا بەرمیلیگ، لە وەختیگ خاو خوەرئاوای تەکساس ناوەنجی ئەمریکی 1.29 دۆلار، یا 1.24 لە سەد زیای کرد، تا رەسیە 102.65 دۆلار.
پەلامارەیل رووژ جمعە، کە ریاز بوختی کەێدە جەنگاوەرەیل پشتگیریکریاگ لە ئیران لەناو عراق، بۊنە مدوو پەکخستن ئەو کڕ لۊلەیلە کە ری دەێدە سعودیە ئەرا هەناردەکردن نەفت لەڕی دەریای سۊرەو دۊر لە گەروو هورمز.
کڕەگە ری دەێدە کلکردن نزیکەی 4 مەلیۆن بەرمیل رووژانە ئەرا بەندەر یەنبوع، کە هاوتاێەس وەرد نزیکەی 4 لە سەد لە دابینکردنەیل نەفتی جەهانی، لە وەختیگ بازرگانەیل و بسینەیل سعودی هوشداری دان لە ئەگەر تەواوبۊن ئەو نەفتە کە ئەرا هەناردەکردن هەیە ماوەی چەن رووژیگ ئەگەر کارەیل دەس وەپی نەکەنەو.
هەمیش جۊلەی کەشتییەیل بارهەڵگر لەڕی گەروو هورمزەو داوەزی ئەرا کەمتر لە 10 رەدبۊن رووژانە ماوەی پشوو کووتایی هەفتەگە، وە وەراورد وەرد ناوەنجی 14 رەدبۊن ماوەی دە رووژ وەرین، ئەوەگ رخباریەیل لەباوەت وەردەوامبۊن شیویان دابینکردنەیل جەهانی زیای کرد.
