نەێزەکیگ لە ئاسمان ولایەت پەنسیلڤانیا تەقیەو

 شەفەق نیوز/ ئاژانس ناسا ئاشکەرا کرد لە یەکەم رووژ  ساڵ نوو لە ئاسمان ویلایەت پەنسیلڤانیا نەیزەکیگ تەقیە و لە ئەنجام تەقینەوەیگ دەنگ گەپیگ لەلیکەفتیە ک وەگورەی تەقینەوەی 30 تۆن تی ئێن تی بۊیە.  

دەزگای چەودێریکردن نەیزەک لە ئاژانس ناسا "NASA Meteor Watch" لە هەشمار تایبەت خوەی لە تووڕ کۆمەڵایەتییەگان گرتەیگ تایبەت وە تەقینەوە دەنگییەگە بڵاوکردیە ک وەلایەن بەشیگ فرە لە دانیشتگەیل دەوروگەرد شار پیتسبورگ هەس وەپیکردنە، باس لەوەش کریا تونی کیشان نەیزەکەگە لە بەرگەهەوا زیاتر لە 72 هەزار کیلۆمەتر بۊیە لە سەعاتیگ. 

لە راگەیەنراوەگە ئەوەیش ئاشکەراکریا  ئەگەر ئاسمان ئەور نەۊیاتاد  تۊنستن وە ئاسانی نەیزەکەگە  جۊر تووپ ئاگریگ بدۊنیەێد. 

وەگورەی زانیارییەیلەی ناسا، تیرەی نەیزەکەگە نزیکەی یەک مەتر بۊیە و کێشی 450 کیلۆگرام بۊیە.