کەنەدا لەوەر ئاگر فەرمان چووڵکردن تەواو شاریگ دەێد... و بڵویزەی ئاگرەگەیش لە یۆنان وەردەوامە

شەفەق نیوز/  دەسەڵاتدارەیل کەنەدا راگەیانن کە ئاگرکەفتن دارسانەیل لە ناوچەیل باکوور خوەڕئاوا ناچاریان کردیە تەواو شار های ریڤەر چووڵ بکەن، کە نزیکەی ٤ هەزار کەس نیشتەجییە و کەفێدە بان دەریاچەی گرێت سلیف و حکومەت هەرێمەیل باکوور خوەرئاوا فەرمان وە گشت کەسیگ لە شارەگە داگە وە کراکارەیل سەرەکیشەو، وەرەو فڕۆکەخانەی شارەگە بچن و چەوەڕی رێنمایی زیاتر بکەن. حکومەت هەرێمەیل باکوور خوەرئاوا لە ئاگادارییگ ئەرا دانیشتگەیل راگەیان "هەر کەسیگ لە های ریڤەر بمینێدەو وەرپرسیاریەتی خۆی کەفێدە  گەردنی، هویچ خزمەتگوزارییگ فریاگوزاری و وەڵامدان وەدەس  نیەکەفێد".

 کەنەدا بەددترین وەرز ئاگرکەفتن لە دارسانەیل تا ئیسە وەخوەی دوینێد، و لە چەن رووژ گوزەشتە زیاتر لە ٥٠ هەزار کەس لە ناویان گشت دانیشتگەیل یێڵۆنایف کە پایتەخت ناوچەیل باکوور خوەرئاواس، ناچار بوین ماڵەیلیان وەجی بیلن.

بیجگە لەوەیش، ئاگر لە دارسانەیل چەن ناوچەیگ یۆنان وەردەوام بوی و زوور فرەیگ لەبان باکوور خوەرهەڵات وڵاتەگە مەنیە، لە ناوچەی ئێڤرۆس، کە هەشت رووژ وەرجە ئیسە ئاگر دارسانەیل لەلی هیز گرد، کە لەوەر بەرزبوین پلەی گەرمی بڵویزە کرد، یەیش بویەسە مدوو فراوانبوین زویوەزی.