ئەمریکا: هایمنە وەردەم ئاڵشتکارییگ لە سروشت پەیوەندی وەگەرد عراق
شەفەق نیوز - بەغداد
وەرپرس کارەیل ئەمریکی لە عراق، ستیڤن فاگن، ئمڕوو شەممە، دووپات کرد کە پەیوەندی ناوەین بەغداد و واشنتۆن لە وەردەم "پیشکەفتنیگ گەورا"س.
فاگن لە کۆنگرەیگ وت، وەپای ئەوەگ باڵیۆزخانەگە خەوەر داگەی: "وەختیگ سەرۆک وەزیرەیل عەلی زەیدی سەردان واشنتۆن کرد لە تاوسان گوزەشتە، دەسەڵاتیگ لە گەل عراقی هەڵگردۊد ئەرا دروسکردن عراقیگ خاوەن سەروەری و ئارام و گەشەدار، کە راگەیان و وت عراق ئمڕوو چۊ عراق دۊکە تەماشا نییەکریەێد.. بەڵکم ئمڕوو بۊسە وڵاتیگ کە پڕە لە دەرفەتەیل گەورا".
هەمیش وت کە "سەرۆک ترەمپ خواستەیل دیرێد لەباوەت پەیوەندییەیل دووانی، هاوبەشییگ بەرهەمدار وەگەرد گەل عراقی کە لەبان بنەمای ئەنجامەیل راسگانی و وەرچەو وسیاگە".
دیاری کرد کە "ئەو رێککەفتنەیلە کە واژوو کریان مەوقەی سەردانەگەی زەیدی کەرتەیل وزە، و چەودیاری تەندروسی، و تەکنەلۆجیا، و کەرتەیل دارایی وە بڕیگ کە رەسیە 60 ملیار دۆلار لەخوەی گرد".
و دووپات کرد "ماوەی کارکردنم چۊ وەرپرس کارەیل لە کلکریای ئەمریکی لە عراق، ئامانجم ئاشکراس، کە تەقەلاکەردنە ئەرا قۊلەوکردن دەرفەتەیل ئابووری و وەدیهاوردن دەسکەفتەیلیگ کە چنە ناو خزمەت بەرژەوەنی هەردوگ وڵاتەگەمان".
وتیش کە "ئیمە هایمنە وەردەم ئاڵشتکارییگ لە سروشت پەیوەندییەگە ناوەین ویلایەتە یەکگرتگەیل و عراق، لە سای گرنگیداین هاوبەشمان وە فراوانکردن دەرفەتەیل بازرگانی".
هەمیش وت: "وەیەکەو، تۊنییمن و وەردەوام بویمن لەی هاوبەشی بەرهەمدارە، و وەدیهاوردن دەسکەفتەیل، و وەدەسهاوردن ئەنجامەیل راسگانی و وەرچەو ئەرا مسۆگەرکردن گەشەسەنین ویلایەتە یەکگرتگەیل و عراق".
