ئەمریکا...یەکەم تویشهاتن وە ئفلیجی مناڵان لە دویای دە ساڵ
شەفەق نیوز/ وەزارەت تەندروسی ولایەت نیویۆرک لە ئەمریکا، رووژ پەنجشەممە، راگەیان، پسایگ تویشهاتن وە ئفلیجی منال توومارکریایە لە دەیشت شار نیویۆرک، و وەرپرسەیل تەندروسی فدراڵی دووپاتکردن یەکەم تووشهاتن وە بیماریەگە لە دویای نزیکەی دە ساڵ توومارکریا.
وەزارەت تەندروسی ولایەتەگە لە بەیاننامیگ راگەیان وشکنینەیل دیاریکەێد ئەو حالەتەی لەناوچەی " روکلاند" توومارکریایە ڤایرۆسیگ فرە درمیە وەپی چوود سەرچەوەگەی لە دەێشت ولاتەیەکگرتگەیل هاتوێد.
باتریشیا شنابیل کۆمیسار تەندروسی ناوچەی روکلاند لە بەیاننامیگ راگەیان، " ئیمە چەودێری بارودۆخە کەێمن وەگەرد وەزارەت تەندروسی ولایەت نیویۆرک و سەنتەر کۆنترۆڵکردن و خۆپارستن کارکەێمن ئەرا چارەسەرکردن ئێ باوەت لەناکاویە ک پەیوەندی وە تەندروسی گشتی دیرێد ئەرا پاراستن تەندروسی و سەلامەتی دانشتگەیل ناوچەگە".
سەنتەر ئەمریکی ئەرا کۆنترۆلکردن و خۆپارێزی وت، دووپاتکرد لە پسایەگە ک لە ساڵ 1997ەو تا ئیسە لە ولاتەیل یەکگرتگ هویچ تویشهاتنیگ وە ئفلیجی مناڵ توومارنەکریایە، باوجی لە ساڵ 2013 سەرچەوەیگ زینگ بوی ک ڤاکسین زارەکی لە دەیشت وڵات وەکارهاتووی.
سەنتەرەگە باسکرد، نیشانەیل ئفلیجی منال هەر جویر نیشانەیل ئەنفلۆنزایە جویر ، چلک کردن قورگ و تەو و شەکەتی و زگچین.
