ماکرۆن رازی وە دەسلەکارکیشان وەزیر ناوخۆی فەرەنسی نییە
شەفەق نیوز - پاریس
ئیمانوێل ماکرۆن سەرۆک فەرەنسی، رووژ دوشەممە، دەس لەکارکیشان لۆران نونێز وەزیر ناوخۆ رەد کرد، وە مدوو ئەو ناڕەزایی و کارەیل تونوتیژییە کە وڵاتەگە لە هەفتەیگەو وەخوەیەو دوینێد.
سەرۆکایەتی فەرەنسا "ئێلیزێ" باس لەوە کرد، کە ماکرۆن داوا لە پۆلیس کردگە شیوازەیل کارکردن نوو بگرنە وەر لە رویوەڕویبۊن ئەنجامدەرەیل کارەیل شیوانن.
وتیش کە ماکرۆن دەسنشان ئەرا "شکستەیلیگ کرد کە هیشت کارەیل تونوتیژی پەیا بوون لە مەوقەی ئەو ناڕەزاییەیلە کە فەرەنسا وەخوەیەو دوینێد".
ئەو خوەینیشاندانەیلە کە سەرانسەر فەرەنسا گردەو ئاڵشت بۊن ئەرا کارەیل ئاژاوە، کە ئاگر نریا لە باڵەخانەی شارەوانییگ و دوکانەیل تاڵان کریان و دیوارەیل باڵەخانەگان پڕ بۊن لە وینە و نۊسینەیل گرافیتی و گرووپە تونوتیژەیل وەرد پۆلیس جەنگ کردن لە شارەیل سەرانسەر وڵاتەگە.
ماکرۆن لە وتاریگ دۊکە یەکشەممە، بانگەواز کردۊد ئەرا پابەندبۊن وە ئارامی دۊای رووژیگ لە خەراوترین رووژەیل ئاڵووزییەیل کە فەرەنسا لە چەن ساڵیگەو وەخوەی دیەسەی، دۊای ئەوە کە ناڕەزاییەیل لەبان "بەرزەوبۊن نرخەیل و داوەزیان خزمەتگوزارییە گشتییەیل" هیشت هەزاران کەس دەسگیر بکریەن و دوکانەیل لە سەرانسەر وڵاتەگە تویش تاڵانکردن یا خراوەکاری بوەن.
