یەکەمین وڵات ڤاکسینکردن هاوڵاتیەیل کردە ناچاری

شەفەق نیوز/ ئیکوادۆر بۊیە یەکەمین وڵات لە جەهان وەرگردن ڤاکسین دژە كۆرۆنا وەلایەن هاوڵاتییەیل کردە ناچاری، بڕیارەگەیش دۊیای توومارکردن ئاڵشتبۊی ئۆمیکرۆن لەو وڵاتە تیەێد.  

وەزارەت تەندروسی ئیکوادۆر راگەیان، “وەرگردن ڤاکسین کۆرۆنا ئەرا مناڵ و گەورەیلە ناچارییە”.  

وەگورەی بڕیارەگەی وەزارەت تەندروسی ئەو وڵاتە، ڤاکسینکردن ناچاری، گشت ئەو كەسەیلە گرێدەو ک تەمانیان پەنج ساڵ ئەوبانە.    

وەزارەتەگە راگەیان، ئەو کەسەیلە هووکار تەندروسی و پزیشکی رێگری لەلیان کەێد ڤاکسین وەربگرن، چەوپووشی لەلیان کرێد.    

تا ئیسە نزیکەی 69% لە دانیشتگەیل ئیکوادۆر ک کەێدە 17.7 ملیۆن کەس تاقە بەش دۊیەم ڤاکسین وەرگردنە، 900 هەزار کەسیشیان تاقەبەش سێیەم وەرگردنە.