ئۆمیکرۆن هەڕەشەی سینەما دەێد
شەفەق نیوز/ بڵاوبۊین ڤایرۆسە نووگەی ئۆمیكرۆن بۊیە جی نیگەرانی دروسکەرەیل سینەمای جەهانی، و بەشیگ لە کۆمپانیایل هونەری باس لەو نیگەرانیە کردن لە گلەوخواردن ئەرا بەسیان سینەمایلە هەکاتی ماوەی بڵاوبۊین کۆڕۆنا لە وەهار ٢٠٢٠.
وەگەرد ئەو خەوەرەیلە باس ئۆمیكرۆن کەن، ئەمریکا و بەریتانیا ز ودەوڵتەیل یەکێتی ئەوروپا، و ئوسترالیا ز بڕیای پاوەنی لەبان گەشتیاری چەسپانن، و یابان و ئیسرائیل وەتەواوی سنووریان لەنوای بیانەیلە بەسان.
وەگەرد مەرەقەزکردن واکسینەیل، و داوەزین شمارەی تۊشهاتنەیل ڤایرۆس کۆڕۆنا، کەمیگ رەوش سینەمای جەهانی خاسەو بۊی، باوجی ئەو خەوەرەیلە لەباوەت ئۆمیكرۆن، هیشت دوورارە دروسکەرەیل سینەما هەناسیان تەنگەو بوود، و دەسیان بلەرزێد.
هەمیش بەشیگ لە دەوڵەتەیل، بڕیار بەسیان سینەما و شانۆ و شۊنەیل گشتی دان، جۊر نەمسا و سلۆڤاکیا، و هۆڵەندا، وو تەقەلای نواگردن ئی نەوەی نووە لە ڤایرۆس کۆرۆنا.
وەگورەی سایت هۆڵیوود ریپۆرت ک رەوانگەی جوولەی سینەمای جەهانی کەێد، شمارەی ئامادەبۊن لە سینەمایل ئەڵمانیا لە دۊیادۊیای هەفتەی گوزەیشتە رەسیە ٥٠٥ تیکت، وە داوەزین ٣٧ لەسەد لە ئاست هەفتانە، ئەوەیش دۊیای خەوەرەیل ئۆمیكرۆن.
