لەبان ژنخوازین.. کوشتاریگ لەناو خیزانیگ سوری لە باشوور تورکیا

شەفەق نیوز/ شار غازی عنتاب لە باشوور تورکیا، تاوانیگ خیزانی دڵتەزن وەخوەی دی، کە گەنجیگ سوری وەناو محمد شێخ ئیسماعيل (26 ساڵان)، خوەشک خوەی وەناو حەلا (18 ساڵان) کوشت، و مەریەم (28 ساڵان) زەخمدار کرد، لە ئەنجام مرافەیگ لەبان ژن و ژنخوازین.

میدیایل تورکیا وتن: بکوشەگە کەفتە دەمەقاڵ سەختیگ وەرد خوەشکەی لەناو ماڵ مەریەم، تا دەوانچە لەلییان کیشا و دەسکردە تەقەکردن.

وتیش: پولیس و فریاکەفتن رەسینە شوین رویداوەگە، دویای رەسین ئاگاداری لە هاوسایل، و دوو دویەتەگە ئەرا خەسەخانە بردن، وەلێ حەلا خوەشکە بویچگەگە گیانی لەدەسدا، و مەریمیش زەخمیی سووکە.

وەگورەی بڵاوکردن سۆشیال میدیا، دویای ئەوە کە حەلا تەقەلا داگە رازی خیزانەگەی بکەێد تا شوی بکەێد وە گەنجیگ کە داوای کردیە، بویەسە دەمەقاڵ و وەردەوەردە تا رەسیە کارەسات.

وەچەودیەیل وتن: پولیس تورکیا کەفتیەسە شوین برا بکوشەگە کە لەو شوینە وایە لە ناوچەی ئەیوب سوڵتان لە غازی عنتاب.

جی باسە کە غازی عنتاب میوانداری نزیکەی نیم ملیۆن پەنابەر سوری کەێد، کە ڕەشتە نزیک یەک چارەک لە دانیشتگەیل ویلایەتەگە کە شمارەیان دوو ملیۆنە.