قەیران خوەراک لە کۆریای باکوور
شەفەق نیوز/ کیم جونگ ئون، رێبەر کۆریای باکوور، هۆشداری دایە ک مەردم وڵاتەگەی لە دابینکردن خوەراک رۊیوەرۊی گرفت بۊنە و لە راپۆرتەیلەیش دەرچگە ک نرخ مەوادەیل خوەراکی وە شیوەی وەرچەویگ بەرزەوبۊیە.
لەی هەفتەیل دۊیایە کارناسەیل هوشداری دانە سەرچەوەیل دابینکردن خوەراک لە کۆریای باکوور داوەزیە و ئیسەیش رێبەر ئی وڵاتە پشتڕاست کردیە ک دۆخ وڵاتەگەی «خەریکە خەراوتر بوود».
هەواڵدەریی ناوەندیی کۆریای باکوور راگەیاننیە کیم جونگ ئوون لە دانیشتنیگ حزب کراکارەیل کۆریا باکوور لەباوەت وە کەمبۊین خوەراک لێدوان دایە.
رۆژنامەیگ کۆریای باشوور ئاشکەرای کردیە نرخ کێلوییگ مۆز لە پیونگ یانگ رەسیە نزیکەی 32 پاوند! لە مانگ گوزەشتە رادیۆی ئاسیای ئازاد لە راپۆرتیگ باس لەوە کرد ک داوا لە بڕیگ لە کشاوەرزەیل کۆریای باکوور کریایە گشت رووژیگ 2 لیتر میز ئەرا وەهێزکردن زەۊیەلیان بەرهەم بارن! داننان وە دۆخیگ وەی جۊرە وەلایەن رێبەر ئی وڵاتە کردەوەیگ فرە دەگمەنە.
ئەو بەردەوام دووپاتکردیە کە هۊچ پسایگ تۊیشبۊین وە کۆرۆنا لە وڵاتەگەی توومارنەکریایە باوجی بابەت کەمبۊین خوەراک لە وڵاتەگەی پشتڕاست کەێد.
کیم جونگ ئونی تەمەن 37 ساڵ لە یەک ساڵ گوزەشتە بەشیگ فرە لە کیش لەشی لە دەست دایە و یەیش گومانەیل لەباوەت تەندروسیی ئەو زیاد کردیە.
