سويد نوێنەر خامەنەئی لە وڵاتەگە دەرکەێد

شەفەق نیوز/ دەسەڵاتەیل سوید، ئمڕوو شەممە، راگەیانن کە بڕیار دانە ئاخون ئیرانی موحسین حەکیم ئیلاهی نوینەر عەلی خامەنەئی و ئیمام (ناوەند ئیمام عەلی+ ئیسلامی لە ستۆکهۆڵم لە وڵاتەگە دەرکەێد، چوینکە دەزگای ئاسایش سوید وە سەرچەوەی هەڕەشە لەبلتت ئاسایش نەتەوەیی زانێدەی.

رووژنامەی "Expressen" سویدی وت: دەسەڵاتەیل دویەشەو موحسین حەکیم دەسوەسەر کردن، و ئیسەیش چەوەڕی جیوەجیکردن بڕیار دەرکردنی لە وڵات کەێد.

رووژنامەگە لە زوان کەسەیلیگ نزیک لەو ئاخون ئیرانیە وتن: هویچ زانیارییگ لەبان مدوو دەسگیرکردنی یا بارکردنی وەپییان نەڕەسیە، و دەزگای ئاسایش گشتی دووپات کرد کە هویچ لێکۆڵینەوەی تاوانی وەرد ئەو ئاخون شیعە نەکریاگە.

گابریێل ويرنستيد قسەکەر دەزگاگە وت: "توانم دووپات بکەم کە ئیمە هویچ لێکۆڵینەوەیگ تاوانی لەی باوەتە نیەکەیمن".

لە دویای ئاشکراکردن کار دەرکردنی، یاکوب فۆرسمید وەزیر کاروبار کۆمەڵایەتی لەبان پلاتفۆرم ئێکس نویسان: ئیران ناوەند ئیمام عەلی ئیسلامی لە یارفالا جویر سەکوویگ ئەرا کارەیلیگ هەواڵگری وەکار هاورد.

هەمیش ئاشکرای هەڕەشەیل ئەمنی کرد لەبان سوید و کەسەیلیگ ئێرانی لە وڵاتەگە، لەناویان خود ئەندامەیل ناوەندە ئایینیەگە.

فۆرسمید وتیش؛ ئی تاوانەیلە فرە رخدارن و خوەی پەیوەندی دیرێد وەرد دەزگای سویدی ئەرا پاڵپشتیکردن تایفەیل ئاینی کە وەگەرد دەزگای ئاسایش گشتی سوید هاوکاری کەن.

وتیش: حکومەت گشت سپۆنسەریگ ئەرا ناوەنەگە وسان، و ریکارەیلیگ ترەک دانریاس تا دی ناوەندەیل ئاینی نەکریەنە ئامراز ئەرا کارەیلیگ گومانی.