سەرچەوەیەیل: پێشنیازیگ ئەمریکی ئەرا بەسین لوتکەیگ سێیانی ناوەین ترەمپ و پوتین و زێلێنسکی
شەفەق نیوز - واشنتۆن
ماڵپەڕ "ئەکسیۆس" ئەمریکی لە سەرچەوەەیل ئاگادارەو وت، کە وەڕێوەبەر هەواڵگری ناوەندی ئەمریکی جۆن راتکلیف - لە سەردانەگەی دۊایی ئەرا مۆسکۆ - هۊرەوکردن رێکخستن لوتکەیگ سێیانی خستەسە ڕۊ کە سەرۆک ئەمریکی دۆناڵد ترەمپ، و هاوتا رووسیەگەی ڤلادیمیر پوتین و ئۆکرانییەگەی ڤۆلۆدیمیر زێلێنسکی گردەو بکەێد.
وەپای ماڵپەڕەگە، سەردانەگەی راتکلیف ئەرا پایتەخت رووسیا ئامانج لەلی ئاشکراکردن ئەوە بۊ کە ئایا سەرۆک دەزگایەیل هەواڵگری رووسی تۊەنن پوتین رازی بکەن وە دەسکردن وە دانوسەنین کە واشنتۆن ناوبژیوانی لەناوی کەێد ناوەین مۆسکۆ و کیێڤ.
لەلای خوەیەو، ترەمپ دیاری کرد کە سەردان وەڕێوەبەر هەواڵگری ناوەندی "رێکاریگ رۆتینی" بۊ، و ئەوەیش رەت کرد کە ئامانجەیلی ئاراستەکردن هوشدارییگ بوود ئەرا رووسیا لەباوەت ئەنجامداین هەر پەلامارەیلیگ لەبان زەوییەیل هاوپەیمانی باکوور ئەتڵەسی (ناتۆ).
لە وەرانوەر ئەوە، راپۆرت "ئەکسیۆس" نشان دا کە رەوشیگ لە گومان زاڵە لەبان لایەن ئۆکرانی لەوەرانوەر نیەتەیل مۆسکۆ، چۊنکە کیێڤ دووپات کەێد کە زانیارییەیل هەواڵگری دیرێد کە نیشان دەنە نەخشەیلیگ کە پوتین نیاز دیرێد جیوەجییان بکەێد ئەرا زیایکردن پرۆسە سەربازییەیل وە ئاستیگ گەورە.
