سەرۆک وەزیرەیل ئیسپانی هەڵوەشانن پەرلەمان راگەیەنێد و داوای هەڵوژاردنەیل پبشوەختە کەێد

شەفەق نیوز- مەدرید

پێدرۆ سانچێز، سەرۆک وەزیرەیل ئیسپانیا، ئمڕوو دووشەممە، داوای هەڵوژاردنەیل پیشوەختە کرد لە 29 تشرین دۊەم/ نۆڤەمبەر ئایندە، و ئەوەیش لە وتاریگ ئەرا ئیسپانییەیل.

کەسەیل نزیک لە سانچێز، کە داوا کردن ناسنامەی خوەیان ئاشکرا نەکریەێد، ئەرا "بلومبێرگ" وتن، کە وەزیرەیل لە حکومەت و وەرپرسە دیارەیل ترەک لە حکومەت و حزب سۆسیالیست پاڵپشتی ئەنجامداین هەڵوژاردنەیل پیشوەختە کەن وەسف خاسترین ستراتیژی دۊای لەدەسدان پەرلەمانی کە زەرەد وە حکومەت رەسان هەفتەی گوزەشتە.

 دیاری کردن کە سانچێز پشوو کووتایی هەفتە لە گردەوبوینویل وەرد کەسایەتییە دیارەیل رەد کردگە.

 مەزەنەیل لەباوەت ئەنجامداین هەڵوژاردنەیل پیشوەختە لە جمعە دەس کردنە هاز گردن، دۊای ئەوەگ پەرلەمان دوو پرۆژە یاسای نائاسایی ئەرا نیشتەجیبۊن رەت کرد کە حکومەت پیشکەشیان کردۊد.

 سەرۆک وەزیرەیل ئیسپانی پێدرۆ سانچێز تۊش لەدەسدانیگ گەورا هات لە هەڵوژاردنەیل هەرێمی کە لە هەرێم ئێکستریمادۆرا رۊ دا، لە یەکەم تاقیکردن هەڵوژاردن ئەرا حزبە سۆسیالیستەگەی.

هاوپەیمان کەمینە کە سانچێز سەرکردایەتیی کەێد کەفتە وەر سەختییەیلیگ لە رەدکردن یاسایەیل لەوەخت وەرگردن دەسەڵات لە ساڵ 2023، وەلی ئی داناین دۊایینە فرە کاریگەر بۊ چۊنکە دابینکردن ماڵەیل نیشتەجیبۊن وە نرخەیل گونجیاگ نۊنەرایەتی دۆسیەیگ بنەڕەتی کەێد ئەرا پاڵپشتیکەرەیلی.

 ویلایەت سانچێز لە یۆلیۆ 2027 کووتایی تیەێد، و ئاستەیل پاڵپشتیکردن حکومەت لە راپرسییەیل لە چەن مانگیگەو داوەزیان کەن، لە وەختیگ حزب گەل پارێزگار و حزب "ڤۆکس" راسڕەو تۊنڕەو پاڵپشتییگ بەس وەدەس تیەرن ئەرا دروسکردن حکومەتیگ هاوپەیمانی.

 شایەت لەدەسدانە پەرلەمانییەگە دەرفەتیگ بەێدە سانچێز و سۆسیالیستەیل ئەرا دروسکردن وتاریگ هەڵوژاردن لە وەرانوەر راستڕەو.

 سانچێز ئەرا یەکەم جار لە ساڵ 2018 دەسەڵات گردە دەس، و تا ئیسە هیچ ویلایەتیگ تەواو نەکردگە، دۊای ئەوەگ دوو جار داوای هەڵوژاردنەیل پیشوەختە کرد، و 8 ساڵ لە دەسەڵات رەد کردگە و ئەو ڕەفتارە وەرد زنجیرەیگ لە قەیرانەیل کەێد.

 ماوەی ویلایەت ئیسەی خوەی نەتۊنست یەی بودجەی حکومی پیشکەش بکەێد، لە وەختیگ کە دۆسیەیەیل گەندەڵی پەیوەندیدار وە حزبەگەی یا خیزانەگەی فرەو بۊن، و ماوەی تاوسان، رەسین نایاسایی ئەرا نزیکەی 80 هەزار کووچبەر وەرەو شار سەبتەی ئیسپانی لە باکوور ئەفریقا بۊە مدوو شەپۆلیگ نوو لە ناڕەزایەتی کۆمەڵایەتی.