سەرۆک وەزیرەیل ژاپۆن: قوربانیەیل فرەیگ لە زەویلەرزەگە کەفتنە

کیشیدا وتیش: "زەرەر و زیان فرەیگ توومار کریاس" و باس لە "فرەیگ لە کەلەمەی گیانی و رمیان باڵەخانەیل و هیزگردن ئاگر کرد".

دیاری کرد کە "بایەسە پێشبڕکێ وەرد وەختەو بیاشتایمن تا ژیان خەڵک رزگار بکەیمن".

رووژ دووشەممە زەویلەرزەی تونیگ داد لە ناوڕاس ژاپۆن و شەپۆل تسونامی لەلی کەفتەو کە هیشت دەسەڵاتداەیل داوا لە دانیشتگەیل ئەو ناوچەیلە بکەن کە شوینیان وەجیبیلن و پەنا وە بەرزاییەیل بوەن.

ناوڕاس ژاپۆن لە ناوەین ساعەت 16:00 دووشەممە تا 09:00 سێشەممە کەفتە وەر 155 بوومەلەرزە و فرەی ئەو زەویلەرزەیلە 3 پلە رەد کردن،  دانیشتگەیل لە شەوەکی سێشەممە هەس وە شەش لەرزەی قایم ترەک کردن.

وەزیر وەرگری مینۆرو کیهارا راگەیان: هەزار سەرباز ئامادەکاری کەن تا وەرەو ناوچەگە بچن، و هەشت هەزار و ٥٠٠ سەرباز ترەکیش کەفتنەسە ئامادەباشی.  نزیکەی بیس فڕۆکەی سەربازی ئەرا هەڵسەنگاندن زیانەیل کل کریانە.

دەزگای کەشناسی ژاپۆن هووشداری دا لە ئەگەر رەسین شەپۆل تسونامی وە بەرزی پەنج مەتر، بەڵام دویای ئەوە ئی مەزەنە ئەرا سێ مەتر کەمەو کرد.

ناوەند ئاگادارکردن تسونامی زەریای ئارام راگەیان: مەترسییەیل تسونامی "وە شیوەیگ وەرچەو کەمەو بویە".

ئەو وینەیلە لە تەلەفزیۆن ژاپۆن پەخش کریان، دەرخستنە کە ئاگریگ لە شار واجیما هیز گرێد وەمدوو زەویلەرزە زیان وە چەن بینایگ کەفتیە.

 کارەبای نزیکەی ٣٣ هەزار و ٥٠٠ ماڵ لە پارێزگایل ئیشیکاوا و تۆیاما و نیگاتا بڕیا، کە گشتییان کەفنە لای دەریای ژاپۆن لە دوورگەی هۆنشو لە ژاپۆن.

هەرلیوا ریە سەرەکییەیل، لە رووژ دووشەممە لە دەورگرد ناوەند زەویلەرزەگە بەسیان و خزمەتگوزارییەیل قەتار فیشەکی شینکانسن لە ناوەین تۆکیۆ و ناوەند زەویلەرزەگە لە ناوچەی نۆتۆ وسیا.

لە مانگ ئازار ساڵ ٢٠١١ وڵاتەگە کەفتە وەر یەکیگ لە بەدترین کارەساتەیل سەردەم مۆدێرن، کە زەویلەرزەیگ وەتونی نۆ پلە داد لە نزیک کەناراوەیل باکوور خوەرهەڵات وڵاتەگە، و لە ئەنجامی شەپوول تسونامی لەلی بویەو و ١٨ هەزار و ٥٠٠ کەس گیانیان لەدەسدان، یا کەشیان یا بیسەروشوین بوین.