سەدان خیزان ئێزدی لە حەلەب دەرچن لەوەر رەوشەیل ئەمنی.. وینە
شەفەق نیوز/ جابر جندو چالاکوان ئێزدی خەوەردا کە سەدام خیزان ئێزدی ناچار ئاوارەیی بوین لە چەن ناوچەیگ لە شار حەلەب سوریا دانەو دەر، لە ئەنجام ئی رویداوەیل دویاییە لە شارەگە، کە کاریگەری راستەوخۆ لەبان کەمینەیل ئاینیی و نەتەوەیی لە ناوچەگە داشتن.
جندو لە قسەیلی ئەرا ئاژانس شەفەق نیوز وت: زیاتر لە ٣٥٠ خیزان ئێزدی لە ناوچەیل شەهبا و تەل رفعەت و شێخ مەقسوود و ئەشرەفیە دەرچگ، و روی وەرەو ناوچەی جەزیرە لە شارەیل حەسەکە و قامیشلی کردن.
وتیش: رەوشەیل ژاوەژاو و رخداریەیل ئەمنی ناچار ئی خیزانەیلە کردن ماڵەیلیان وەجی بیلن و مینەی شوینیگ ئارامتر بکەن لە سای وەردەوامی شیواشیو ئەمنی و ژیانگوزەرانی لە وڵات.
جندو باس رخەیل گەورەیگ مبک لەبان چارەنویس کەمینەیل ئاینی و نەتەوەیی لە سوریا، کە هەزاران خیزان لە تایفەیل ناچار ئاوەرەبوین لەناو وڵاتەگە بوین، کە قەیران مرۆیی وەردەوام زیایەو کەێد.
وتیش؛ خیزانەیل ئێزدی کە وەشیوەیگ وەختانە لە ناوچەیلیگ ئارامتر داکاسیان، کەفتنەسە سەختی، کە ئاسانترین ئامرازەیل ژیان نەیرن، و کەمپەیل فەرمی و خزمەتگوزاری سەرەتایی نەیرن.
وتیش: نەوین ریخریاگەیل ناودەوڵەتی لەو شوینەیلە ژیان ئەو ئاوارەیلە زیای کرد کە فرە هەوەچە وە دەسمیەت مرۆیی زویوەزوی دیرن.
جندو دووپات لە گرنگی دەسوەردان کۆمەڵگای ناودەوڵەتی و ریخریاگەیل مرۆیی کرد ئەرا رەسین وە هانای ئی ئاوارەیلە، وەتایبەت وەگەرد نزیکەوبوین وەرز زمسان، کە سەختیەگە وەبانیان زیایەو کەێد.
لە کۆتایی قسەیلی، جابر جندو باس ئی رووژ میژوویە کرد ئەرا گەل سوریا، دویای رمیان رژیم ئەسەد، وەلێ لە خود وەختەگە هوشداری لەوە دا کە ئی ئاڵشتبوین سیاسیە رخداری گەورە وەرد خوەی لەلای سوریەیل هاورد، وەتایبەت وەگەرد دەرکەفتن گرووپەیل تونەڕەوی کە هاتێ هەڕەشەی ئاشتەوایی لە وڵاتەگە بیەن.
