پزشکیگ میسری لەناو ئاگر و دویکەڵ نەشتەرگەری تەواو کەێد
2023-02-02T12:41:09+00:00
شەفەق نیوز/ لە رەفتاریگ ئازایی وەلایەن پزشکیگ میسری، ک نەشتەرگەری زایین مناڵ ئەرا ژنیگ تەواو کرد، هەرچەن خەسەخانەگە ئاگر گردیە و فرەی کارمەنەیل لەناو خەسەخانەگە واینە.
وەگورەی رووژنامەی "المصري اليوم"، ئاگر گەپیگ لەناو خەسەخانەی نوور لە گەڕەک مەتەریە لە قاهیرە، وەگەرد دەسکردن نەشتەرگەری ئەرا زایین ژنیگ وەلایەن پزشکیگ هیز گرد.
وەچەودیەیلیگ وتن: کارمەنەیل لە خەسەخانەگە دانەو دەیشت تا خوەیان لە ئاگر قورتار بکەن، و پزشکەگە لە شوین خوەی تەکان نەیا تا زایین ئەو ژنە تەواو بکەێد، هەرچەن خەسەخانەگە پڕ لە دویکەڵ بوی.
وتنیش: پزشکەگە قەسەم خوارد لەناو ژوور نەشتەرگەری بمینێد تا ئەو ژنە مناڵەگەی بزاێد و دڵنیا بوود.
وتنیش: پزشکەگە نەشتەرگەری وە وەختیگ پەیمانەیی ئەنجام دا، و ژن و کوورپەگە رزگار کرد، ئیجا هەکاتی فیلمەیل سینەما لەناو ژوور پڕ دویکەڵ و خەسەخانەی پڕ ئاگر دەرچگ.
وەزارەت تەندروسی میسری،کوشیان سێ کەس و زەخمداری دەیان کەس لە ئاگر ناو خەسەخانەگە راگەیان.
