زەخمداربۊن 7 خوەنەوار دۊت وە رویداویگ چەقووکیشان کە "دۊت هەرزەکاریگ" لەناو مەکتەوەیگ لە ئیستەنبوڵ جیوەجی کرد
شەفەق نیوز- ئیستەنبوڵ
مەکتەوەیگ ناوەنجی لە ناوچەی باشاک شەهیر لەناو پارێزگای ئیستەنبوڵ تورکی، ئمڕوو سێشەممە، رویداویگ چەقووکیشان وەخوەیەو دی کە بویە مدوو زەخمداربۊن شمارەیگ لە دۊتە خوەنەوارەیل، لە ناوەین ئامادەباشییگ ئەمنی و پزیشکی فراوان.
میدیایەیل راگەیانن تورکی دیاری کردن، کە 7 خوەنەوار دۊت لە رویداوەگە زەخمدار بۊنە کە لەناو مەکتەو "شێخ شامل ئیمام خەتیب" لە ناوچەی کایا شەهیر سەر وە باشاک شەهیر رۊ دایە، لە وەختیگ زانیارییە سەرەتاییەیل نشان دەن کە 3 لە زەخمدارەیل لە رەوشیگ رخبارن.
وەپەی راپۆرتەیل، ئەو گومانلیکریاگە خوەنەواریگە لە تەمەن 15 ساڵ و لە مەکتەوەیگ ترەک خوەنێد، و چگەسە ناو مەکتەوەگە لە وەختیگ چەقوویگ هەڵگردگە، وەرجە ئەوەگ پەلامار شمارەیگ لە دۊتە خوەنەوارەیل بەێد، تا ئەوەگ یەکیگ لە ئەندامەیل ئاسایش مەکتەوەگە تۊنست کۆنترۆڵی بکەێد و بەێدەی دەس پولیس.
زەخمدارەیل ئەرا خەسەخانە بریان ئەرا وەرگرتن چارەسەر، لە وەختیگ دەسەڵاتەیل تورکی دەس کردنە لێکۆڵینەوەیگ دادوەری و کارگێڕی ئەرا رەسین وە بندروس رویداوەگە، هەمیش دەسەڵاتەیل دۊاتر بڕیاریگ دەرکردن وە کۆتکردن بڵاوکردن لەباوەت رویداوەگە لە ماوەی لێکۆڵینەوەگە.
