زەخمداربۊن 5 کراکار وە تەقینەوەیگ لە کارگەیگ تەقەمەنی لە ئیسپانیا

شەفەق نیوز - مەدرید

دەزگایەیل راگەیانن ئیسپانی، رووژ جمعە، خەوەر دان لە زەخمداربۊن پەنج کراکار وە تەقینەوەیگ کە لە کارگەیگ تەقەمەنی لە شار غەرناتەی ئیسپانی روی دا.

رووژنامەی "ئیدیاڵ" ئیسپانی ناوخۆیی دەسنشان ئەرا ئەوە کرد کە تیپەیل فریاکەوتن وەپەلە رەسینە شوینەگە دۊای ئەوەگ دانیشتگەیل خەوەر دان کە تەقینەوەگە جۊر زەویلەرزەیگ وەهیز بۊە.

هێمان هوکار تەقینەوەگە نەزانریاگە، هەرچەن وینەیل پشتڕاسنەکریاگ لەبان تووڕەیل پەیوەندی کۆمەڵایەتی بڵاوەو کریەن کە دیارە ستوینیگ گەورە لە دویکەڵ نیشان دەن کە لە شوینەگەو بەرزەو بوود.

لە وەختیگ راپۆرتە سەرەتاییەیل باس ئەوە کردن کە تەقینەوەگە لە ناوچەی سزانن سەروە کارگەگە روی داگە وەرجە سەعات نۆی شەوەکی وەپەی وەخت ناوخۆیی ئمڕوو جمعە.

دانیشتگەیل ناوچەگە و کەسەیلیگ کە لە گەڕەکەیل ترەک ژیەن خەوەر دان کە تەقینەوەگە وەهیز بۊە و هەس وە لەرزەیگ جۊر زەویلەرزەیگ وەهیز کردنە، و مەردم لە دۊری چەن میلیگەو هەس وەپی کردنە.

تا ئیسە هیچ راپۆرتیگ لەباوەت زەخمداربۊن سەخت نەهاتگە، وەرد زەخمداربۊن پەنج کراکار، کە دوانیگ لەلیان لە شوینەگە چارەسەر سزیان ئەرایان کریا، و سێیەگەی ترەک گواستریانەو ئەرا خەستەخانە وە هوکار زەرەدڕەسین وە ژنەفتنیان.