گەرمی لە ئەوروپا سەختەو بوود

ئمڕوو ئیتاڵیا و ئیسپانیا و یۆنان کەفنە وەر گەرمای سویەریگ، و ئەو وڵاتەیل کیشوەر ئەوروپا جویر فەرەنسا و ئەڵمانیا و پۆڵەندا لە چەن رووژ بانان  پلەی گەرمییان چوودە بان.

 دوورگەیل سیسیلیا و ساردنیا هانە ناو ئەو 16 ناوچە کە دەسەڵاتدارەیل ئیتاڵیا هووشداری کەشناسی سوور دەرکردنە، مەزەنە کەن پلەی گەرما بڕەسێدە 45 پلەی سەدی.

مەزەنە کریەێد پلەی گەرما لە پارێزگای تارێنت لە باشوور ئیتاڵیا بڕەسێدە 46 پلەی سەدی، وەیەوە شمارەی پەیمانەیی لە کیشوەر ئەوروپا کە لە ساڵ 2021 لە دورگەی سیسیلیا توومار کریاوێد وە زیاتر لە 2.8 پلە شکان.

کارلۆ بۆنتێمپۆ پسپۆڕ کەشوهەوا هووشداریدا لەوە ک ئەو ناوچەیل کیشوەر ئەوروپا توەنن ئاست گەرمی هاوشیوەی پەیمانەیی وەخوەیان بوینن.

پلەی گەرما لە مەدرید پایتەخت ئیسپانیا ئەرا بان ٤٠ پلەی سەدی بەرزەو بوود.

ئاگر لە دوو ناوچەی نزیک ئەسینای پایتەخت یۆنان هیز گرد، و لەوەر وای قایم گوڵپەی زیای بوی، تا ئەو مەوقە ک  لە ژیر کۆنتڕۆڵ دەرچین.

 تووڕ "سکای نیوز" بەریتانی بڵاو کرد، کە ئاگر گەپیگ ماڵەیل کاول کرد و هەزاران کەسیش ناچاربوین لەو ناوە دەرچن.

پلەی گەرما لە ئەسینای پایتەخت رەسێدە بان ٤٠ پلەی سەدی، یەیش چەن رووژیگ دویای بەسیان ئەکرۆپۆلیس کە دیارترین شوین گەشتیارییە تا ماوەیەیگ وەختانە ئەرا مقیەتیکردن گەشتیارەیل لە تیشک خوەر.

ئاگرەگە ناوچەیا نزیک پایتەخت یۆنانی گردەو، لە وەختیگ تیمەیل ئاگرکپکردن لە ئاوای کۆڤاراس کە ٣٠ کیلۆمەتر لە باشوور خوەرھەڵات ئەسیناو دویرە، خەریک کپەوکردن بڵویزەی ئاگرەگە بوین.

ئاگرکەفتنەیل ناچار دەسەڵاتدارەیلە کردن سەدان مناڵ کە بەشداری لە کەمپیگ تاوسانی کە ٨٠ کیلۆمەتر لە خوەرئاوای ئەسینای پایتەختەو دویرە، چووڵ بکەن.

فەرمان چووڵکردن لەلای کەمەو ئەرا شەش کۆمەڵگەی کنار دەریا دەرچگ، لەوەر نزیکەوبوین ئاگرەیل لە شوینەیل گەشتیاری.

یۆنان ئامادەکاری کەێد ئەرا دویەم شەپۆل گەرمای تونتر کە مەزەنە کریەێد لەی هەفتە بوود، کە کاریگەری لەبان ئەو وڵاتە و ئەو وڵاتەیل ئەوروپا دیرێد.