دوزەق کۆڕۆنا هیند گرێدەو.. پۆلیس مینەی شوین ئەرا سزانن تەرمەیل کەێد
شەفەق نیوز/ پۆلیس لە نیودلهی پایتەخت هیند، ئمڕوو جمعە، داوا لە دەسەڵاتە ناوخۆییەکان کرد شوینەیلیگ زیاتر ئەرا سزانن تەرم قوربانیەیل کۆڤید-١٩ پەیا بکەن، لە وەختیگ ک وڵات هێند کەفتیەسە وەر دوویەم شەپۆل سەختیگ لە بڵاوبوین کۆڕۆنا.
دوێەکە گشت ژمارەی تووشهاتنەکان لە ١٨ مەلیۆن رەد کرد، وەگەرد تۆمارکردن ٣٨٦٤٥٢ تووشهاتن نوو، ک خوەی دوویەم بەرزترین ئامارە لە جهان.
وڵاتەگە هیمان کەمی لە ئۆکسجین و شەوخەفەیل خەسەخانەیل وەخوەی دوینێد، و مەردمەگە وەردەوامن لەداواکردن دەسمیەتی لەبان میدیایل پەیوەندیە کۆمەڵایەتیەکان.
یەکیگ لە ئەفسەرە گەورایل پۆلیس نیودلهی وت: مەردمەگە ناچار بوینە تەرم کەسەیلیان لە شوینەیلیگ بسزنن ک تایبەت ئەرا قوربانییەیل ڤایڕۆس کۆڕۆنا نەکریانە، ئەراوە داوا پەیاکردن شوینەیلیگ زیاتر کردیمن.
حکومەت هیندی کەفێدە وەر رەخنەیل فرەیگ لە رەفتارکردنی وەگەرد پەتاگە، و ریداین وەگردەوبوینەیل هەڵبژاردن و ئاهەنگە ئایینیەکان.
