دویای چەن ساعەتیگ لە راگەیانن وسانن تەقە.. تەقینەوەیل نەزانیاییگ لە باشوور ئیران

شەفەق نیوز- خوەرهەڵات ناوڕاس

دەزگایەیل راگەیانن ئیرانی، ئمڕوو چوارشەممە، خەوەر دان لە کەفتن چەن تەقینەوەیگ لە باشوور ئیران، ئەوەیش دویای چەن سەعاتیگ لە راگەیانن وسانن تەقە لەناوەین واشنتۆن و تاران.

ئاژانس هەواڵەیل "میهر" وت: ئەو تەقینەوەیلە لە پاڵاوگەیگ لە باشوور وڵاتەگە بوینە و هوکارەگەییش نەزانریاس.

 دۆناڵد ترەمپ سەرۆک ئەمریکی، شەو سێشەممە – چوارشەممە، رەزامەنی خوەی نیشان دا وە وسانن پەلاماردان ئیران و جیوەجیکردن پەلامارەیل ئەرا بانی تا ماوەی دوو هەفتە.

ترەمپ، لە بڵاوکریاییگ لەبان پلاتفۆرم "ترووس سۆشاڵ" وت: بڕیارەگەی لە بنەمای ئەو گفتوگۆ بویە کە وەگەرد شەهباز شەریف سەرۆک وەزیرەیل پاکستان و عاسم مونیر فەرماندەی سوپای پاکستان ئەنجامی داگە، کە داوای وسانن بەرزەوکردن گرژییە سەربازییەیلە کردن.

وئیسرائیل و ئەمریکا لە 28 شوبات گوزەشتە پەلاماریگ وەردەوام ئەرا بان ئیران جیوەجی کردن، کە بویە مدوو گیان لەدەسداین سەدان کەس، لەناویانیش عەلی خامنەئی ریبەر باڵا، و لە 2 ئازار  ئیسە پانتایی جەنگەگە لە ئاست هەرێمی فراوانەو بوی تا لوبنان بگرێدەو دویای چگن حزبولڵا ئەرا ناوی.

ئیران وەڵام پەلامارە ئەمریکی-ئیسرائیلییەگە دادەو، کە بویە مدوو گورزەیل فراوانیگ لە وڵاتەیل ناوچەگە، کە هەریەک لە عراق و ئیسرائیل و ئوردن و کووەیت و بەحرەین و قەتەر و ئیمارات و سعودیە لەخوەی گرد.