دویای داواکردن چاکسازی.. تاڵیبان نیاز نویسین دەستوور نوویگ لە ئەفغانستان دیرێد

شەفەق نیوز/ حکومەت وەختانەی تاڵیبان لە ئەفغانستان، دەسکردە نویسین دەستوور نوویگ، تا لەجیای دەستوور وەرین بوود.

زەبیحولڵا موجاهید قسەکەر حکومەت لە دیداری وەگەرد تووڕ "تلوع نیوز" ئەفغانی وت: نیاز نویسین دەستوور نوو دیریمن، تا ئەو پایەیل رژیمەگە تەواو بوود، ئەرا بیناکردن دەوڵەت نوویگ.

دویای رمیان حکومەت وەرین لە ئاب ٢٠٢١، چارەنویس دەستوور لە ئەفغانستان نادیار بوی، و ئی راگەیاننە لەلایەن موجاهید وەگەرد ئەوە هات ک سەڵاحەدین ئەیوبی گرنگترین سەرکردەی ئۆزبەکی وەگەرد سەرکردەیل تاڵیبان لە قەندهار باس جیوەجیکردن چاکسازی کرد.

ئەیوبی ڕازی وە زاڵبوین تاڵیبان لەبان دەسەڵات و دویرخستن ئەو لایەنەیل ئەفغانستان نییە، وداوای جیوەجیکردن چاکسازی لەناو حکومەت تاڵیبان کەێد.