"دەسدریژییەیل سێکسی" لەبان مناڵەیل.. توومەتەیل ئەرا باوگ ژن شازادە هاری وە "ئیپستین بەریتانیا"
شەفەق نیوز - عەرەب لەندەن
پولیس لەندەن پایتەخت بەریتانیا ئاشکرا کرد لە رەوانەکردن ئەو بانگەشەیلە کە پەیوەندی وە تۆماس مارکڵ دیرن، باوگ میگان ژن شازادە هاری، ئەرا لایەنەیل جیوەجیکردن یاسا لە دەیشت شانشین یەکگرتگ، وە هاووەختی وەرد وەدویاچگن وە چوینیەتی رەفتارکردنی وەرد نامەیگ کە توومەتەیلیگ دژ وەپی لەخوەی گردۊد وەرجە نزیکەی هەفت ساڵ.
دەسەڵاتەیل فلیپینی لێکۆڵینەوە کەن لە بانگەشەیل بویین باوەتەیلیگ لای مارکڵ کە پەیوەندی وە دەسدریژی سێکسی لەبان زاڕووەیل دیرن، دۊای ئەوەگ کوڕەگەی تۆماس مارکڵ جونیۆر خەوەر دا پولیس کە وینەیل و ئامێرەیل ئەلیکترۆنی لە ماڵ وەرین باوگی لە شار سیبۆی فلیپینی پەیا کردگە.
دەسەڵاتەیل هێمان وەشکین ئەرا بەڵگە دیجیتاڵییەیل کەن ئەرا دیاریکردن سروشتیان و رادەی پەیوەندییان وە بانگەشەیلەو.
دۆسیەگە لە پەلیگ لەلی گلەو خوەێد ئەرا نامەیگ کە پولیس پایتەخت لەندەن لە کانوون دویەم/ یەنایەر 2019 وەری گردگە، کە بانگەشەیلیگ لەخوەی گردۊد لەباوەت سەرپێچییەیلیگ کە گومان کریەێد لە دەیشت بەریتانیا روی داون.
پولیس وت کە نامەگە رەوانە کردگە ئەرا یەکەی پاراستن تایبەت وە ئاسایش میگان، وەرجە ئەوەگ بڕیار بەێد نوسینگەی دوق و دوقەی ساسێکس لەلی ئاگادار بکەێد، وەلێ وردەکارییەیل بانگەشەیل رەوانە نەکردگە ئەرا ئاژانسەیل ترەک جیوەجیکردن یاسا لەو وەختە.
پولیس راگەیان کە وەدویاچگن کەێد وە شیوەی رەفتارکردنی وەرد نامەگە، لە وەختیگ رووژنامەی "تایمز" خەوەر دا کە دەزگاگە خوەی رەوانە کردگە ئەرا نویسینگەی سەروەخوەی ئەرا رەفتار پۆلیس، کە لایەن چەودیاری تایبەتمەنە وە وەدویاچگن وە رەفتارەیل پولیس لە بەریتانیا، ئەرا نووڕستن لە چوینیەتی چارەسەرکردن دۆسیەگە.
پرسیارەیل خەسەو بوون لەباوەت هوکارەیل رەوانەنەکردن زانیارییەیل ئەرا لایەنەیل پەیوەندیدار جیوەجیکردن یاسا لە دەیشت وڵاتەگە، و ئایا رەفتارکردن وەرد نامەگە وەپەی ریکارە گونجیاگەیل بۊە.
وەپەی راپۆرتیگ کە رووژنامەی "گاردیان" لە 25 تشرین یەکەم/ ئۆکتۆبەر ئیسە بڵاوی کردگە، وەزیر ناوخۆی فلیپینی جۆنڤیک ریمۆلا وت کە نیشانە سەرەتاییەیل خوازن لێکۆڵینەوەیگ گشتگیر ئەنجام بیریەێد، وە دووپاتکردن ئەوە کە وشکینە تاوانکارییە دیجیتاڵییەیل هەوەجەن ئەرا رەسین وە وینەیگ یەکلاییکەرە لەباوەت ناوەڕۆک ئامێرەیل.
تۆماس مارکڵ جونیۆر خەوەر داۊدە دەسەڵاتەیل کە، وەپەی قسەی خوەی، سەدان یا هەزاران وینە پەیا کردگە کە گومان کریەێد پەیوەندی وە دەسدریژی سێکسی لەبان مناڵەیل داشتوون، لەناو ئامێرەیل کۆمپیوتەر و تەلەفۆنەیل مۆبایل کە لەناو سندوقەیلیگ لە ماڵ وەرین باوگی لە سیبۆ هەڵگیریاۊن.
دەسەڵاتەیل فلیپینی دیاری کردن کە هاوکاری کەن وەرد لایەنە هاوتایەیل لە دەوڵەتەیل ترەک ئەرا دیاریکردن شوین مارکڵ و گردنەوەر ریکارە یاساییە گونجیاگەیل ئەگەر بەڵگەیل بویین بنەمایگ تەواو بچەسپنن ئەرا توومەتکردن وەپی.
هەمیش نویسینگەی لێکۆڵینەوەی فیدراڵی ئەمریکی راگەیان کە ئاگادار بانگەشەیلە، و پاڵپشتی گونجیاگ پێشکەش کەێد ئەرا دەسەڵاتەیل فلیپینی، و نووڕێدە هەر سەرپێچییگ ئەرا یاسای فیدراڵی ئەمریکی کە پەیوەندی وە دۆسیەگەو داشتوود.
میگان، لە بەیاننامەیگ کە هەفتەی گوزەشتە دەرچگ، وت کە هەس وە شۆکیگ تون کەێد لە وەرانوەر ئەو زانیارییەیلە کە دەرکەفتنە، وە نیشانداین هاوسووزی خوەی وەرد هەر مناڵیگ کە شایەت زەرەد وەپی رەسوێد.
دیاری کرد کە زانستگە وە بانگەشەیل پەیوەندیدار وە باوگی دۊای ئەوەگ پولیس بەریتانی ئاگاداری کردگە لە نامەیگ کە بانگەشەیلیگ لەخوەی گردۊد کە وە نیگەرانکەر باسیان کرد، و وتیش کە دڵنیایی وەرگردگە کە ئی بانگەشەیلە هانە ژیر لێکۆڵینەوە.
دووپاتیش کرد لەبان ئەوە کە بڕیار بڕین پەیوەندی وەرد باوگی و ریگریکردن لەلی لە دۊنین دوو مناڵەگەی، شازادە ئارچی و شازادە لیلیبێت، ئەرا مقەیەتیکردنیان بۊە، وە نیشانداین ئومید خوەی لە وەدیهاوردن دادپەروەری و داین لەپیشینەیی ئەرا بیوەیی مناڵەیل.
میگان لە سەرەتا دەسنشان ئەرا ئەوە کردۊد کە نامەگە لە ساڵ 2018 کل کریاگە، وەرجە ئەوەگ قسەکەریگ وەناوی دیاری بکەێد کە هەڵە کردگە لە وەهویرهاوردن میژووەگە، و توومارەیل پۆلیس دەسنشان ئەرا ساڵ 2019 کەن.
لە وەرانوەر ئەوە، تۆماس مارکڵ بوون ئەو باوەتە بانگەشەکریاگەیلە لای خوەی رەتەو کرد، و توومەتەیل وە دروو باس کرد، و ئەرا رووژنامەی "دەیلی مەیل" وت کە سێکس وەرد هیچ کەسیگ لە ژیر تەمەن 18 ساڵان نەکردگە.
هەمیش وت کە ئامێرەیل کۆمپیوتەر لای ئەو نەۊنە لە وەخت هیشتنەجی مەکسیک وەرد کوڕەگەی لە ساڵ 2025 و ئەرا فلیپین بردیەسەی، وە دەسنشانکردن ئەرا ئەوە کە ئامادەس ئەرا هاوکاریکردن وەرد دەسەڵاتەیل.
دەسەڵاتەیل، تا ئیسە، ئەنجامەیل کۆتایی ئەرا وەشکینە دیجیتاڵییەیل یا توومەت تاوانکاری فەرمی دژ وەپی رانەگەیاننە، لە وەختیگ لێکۆڵینەوەیل لە فلیپین و وەدویاچگن وە رەفتارکردن پولیس بەریتانی وەرد خەوەردارییە وەرینەگە وەردەوامن.
