دەسگیرکردن چەکداریگ لەنزیک کۆشک چەرمگ کە پلان ئەرا تیرۆرکردن ترەمپ داناوێد

شەفەق نیوز - واشنتۆن

دەزگای خزمەتگوزاری نهێنی ئەمریکا، ئمڕوو شەممە، هویردەکاری دەسگیرکردن کەسیگ چەکدار لەنزیک کۆشک چەرمگ ئاشکرا کرد، لەدویای راپۆرتەیلیگ لەبان   ژلاندانان ئەرا تەقەلای تیرۆرکردن سەرۆک ئەمریکا دونالد ترەمپ.

وەپای بەیاننامەیگ  لە وەزارەت ئاسایش نیشتمانی دەرچگە و تووڕ CBS News بڵاوی کردییە، توومەتبار دەسگیرکریاگ کووچبەریگ بێ بەڵگەنامەی یاساییە، و بڕیگ چەک وەردی بویە هنای کە دەسگیر کریا، لە رووژ پەنجشەممەی گوزەشتە.

وەزارەتەگە دیاری کرد،  توومەتبارەگە ناوی (رۆنی یۆردڕێکس گوانێبا چێرینۆس)ە لە فەنزوێلا، و  توومەتبارکردنی 3 چشت گرێدەخوەی  "هەڵگردن چەک تەقەمەنی وە شێوەی نایاسایی، و هەڵگردن چەک  توومارنەکریاگ، و هەڵگردن گولەی توومارنەکریاگ".