خامنەیی نوقەڵانەی جەنگیگ فراوانتر دەێد و عراق بەسێدەو وە بەرەیل رۊوەرۊبۊن وەرد ئەمریکا
شەفەق نیوز- تاران
موجتەبا خامنەیی، ریبەر ئیرانی، رووژ چوارشەممە، باس فراوانکردن مەودای رۊوەرۊبۊن وەرد وڵاتەیل یەکگرتگ کرد لە ئەگەر دووپاتەوبۊن پەلامارەیل لەبان وڵاتەگەی، وە هەژمارکردن ئەوە کە کۆنترۆڵکردن ئیران لەبان گەروو هورمز و ئامانجگردن بنکەیل ئەمریکی لە ناوچەگە نۊنەرایەتی ئاڵشتکارییگ کەن لە هاوسەنگییەیل هێز، لە وەختیگ پەیوەندی بەس لە ناوەین ئەوەگ وە "یەکگردن گۆڕەپانەیل مقاوەمە" لە فەلەستین و لوبنان و عراق و یەمەن وەسفی کرد، وەرد نیشانەیل دروسبوین سیستەمیگ جیهانی نوو.
خامنەیی، لە پەیامیگ وە بۆنەی رووژ نیشتمانی ئەرا رۊوەرۊبۊن وەرد لووتبەرزی جیهانی (ئیستکبار)، کە رێک کەفێدە چوارەم لە تشرین دۊیەم/ نۆڤەمبەر وت، کە "وەڕێوەبردن گەروو هورمز لەلایەن ئیرانەو و خاپوورکردن بنکە سەربازییەیل ئەمریکی لە دەوڵەتەیل ناوچەگە، ئەگەریش جۊر وەڵامدانیگ بۊن ئەرا دەسدریژی و تاوانەیل ئەمریکی لەناوی جەنگ چەسپیاگ سێیەم، وەلێ ئەوان هەمیش نۊنەرایەتی جیهادیگ سەرەتایی کەن لە دژ لویتبەرزی لەبان ئاست هەرێمی".
هوشداری دا لەوە کە ئی رۊوەرۊبۊنە "رەهەندەیل فرە فراوانتریگ وەرگرێد ئەگەر دەسدریژییەیل دووپاتەو بۊن".
خامنەیی ئەوە وە هەژمار برد کە ئەو وەرەونواچگنەیل لە کەنداو، و وە تایبەت گەروو هورمز، ئەوەگ ئاشکرا کرد کە وە "ساختەبۊن ئەفسانەی ئەمریکای شکستنەخواردگ" وەسفی کرد، و لە هەمان وەخت لاوازی ئەو حکومەتەیلە نیشان دا کە لە ئاسایش خوەیان پشت وە هێزە دەیشتەکییەیل بەسن، وەرد بیتوانایی هێزە گەورەیل لە پاراستن هاوپەیمانەیلیان.
دیاری کرد کە "ئی هێزە، لە شان یەکگردن گۆڕەپانەیل بەرەی حەق و دەسکەفتەیل پاڵەوانانەی زیرەکانە و هازدار ئەرا بەرەی مقاوەمە، لە فەلەستین و لوبنانەو تا عراق و یەمەن، نۊنەرایەتی مزگانی رووشن کەێد ئەرا بەرزەوکردن پەرچەم بەرەی حەق و خوەشککردن ری ئەرا سیستەمیگ جیهانی نوو".
لەباوەت پەیوەندییەیل وەرد واشنتن، ریبەر ئیرانی دووپات کرد کە دژمنایەتی ئەمریکی ئەرا وڵاتەگەی دی پەیوەندیدار نییە وە رۊداوەیل یا ناکۆکییەیل دیاریکریاگ، بەڵکم ئاڵشت بۊە ئەرا رۊوەرۊبۊنیگ وەردەوام، وە تاوانبارکردن وڵاتەیل یەکگرتگ وە تەقەلا ئەرا "بەشەوکردن ئیران و ملکەچکردن گەلەگەی و رمانن سیستەمەی و خاپوورکردن شارستانییەتیی".
خامنەیی ئەوە خستە رۊ کە وە زنجیرەیگ لە دەسوەردانەیل ئەمریکی لە کاروباریەیل ئیرانی هەژماری کرد، لە کودەتای ساڵ 1953 لە دژ حکومەت محەمەد موسەدەقەو دەس وەپیکرد، تا رەدبۊن وە پاڵپشتی سیستەم شا و جەنگ عراقی ئیرانی و سزایەیل ئابووری، و رەسین وە تیرۆرکردن فەرماندەی وەرین فەیلەق قودس قاسم سولەیمانی و ئەو پەلامارە سەربازییەیل دۊاییە کە بۊنە هووکار کوشیان باوگی، ریبەر وەرین عەلی خامنەیی، و شمارەیگ لە فەرماندە سەربازییەیل و زانا و مەدەنییەیل.
دووپات کرد لەبان ئەوە کە وڵاتەیل یەکگرتگ تەقەلا دەێد "تەسلیمبۊن بی مەرج" لەبان ئیران بسچەپنێد، وە هوشدارداین لەوە کە پیشکەشکردن سازشەیل نییەوودە هووکار دواییهاوردن وە دژمنایەتیەگە، بەڵکم واشنتن گاڵ
دەێد لەبان چەسپانن خوازینەیل زیاتر و بەرپاکردن جەنگەیل نوو.
لەی چوارچیوە، ئەوە وە هەژمار برد کە پشت بەسین وە ئاڵشتکردن ئیدارەی ئەمریکی یا ئاڵشتکاری لە هاوسەنگییەیل هێز پارتایەتی لەناوی وڵاتەیل یەکگرتگ نۊنەرایەتی "هەڵەیگ گەورە" کەێد، وە دووپاتکردن لەبان ئەوە کە ئاڵشتکردن رەفتار ئەمریکی نەبایەس وەدی باریەێد لەڕی پیشکەشکردن ئیمتیازاتەو.
خامنەیی هێز سەربازی و دەسەڵات ناودەوڵەتی ئەرا وڵاتەیل یەکگرتگ وە ئەوە وەسف کرد کە "پاشەکشەیگ بی گلەوخواردن" وەخوەیان دۊنن، وە هەژمارکردن ئەوە کە ریڕەو کەمەوبۊن هەژموون ئەمریکی خێراترەو بۊە وە هووکار ئەو وەرەونواچگنە سەربازی و سیاسییەیل دۊاییە.
دەسەواژەی "یەکگردن گۆڕەپانەیل" دەسنشان کەێد ئەرا ستراتیژییگ کە ئیران و ئەو گرووپە چەکدارەیلە کە وەگەردی هاوپەیمانن پەسەنی کەن، کە لەبان بەسانن بەرەیل رۊوەرۊبۊن لە ناوچەگە و هەماهەنگیکردن جۊلەیل سەربازی و سیاسی لە دژ ئیسرائیل و وڵاتەیل یەکگرتگ وسیەێد، وە شیوەیگ کە ریگری لە پەراوێزخستن هەر بەرەیگ لەوەی تر کەێد.
دەسەواژەگە لە ماوەی رۊوەرۊبۊنەیل فەلەستینی لە ساڵ 2022 دەرکەفت، وەرجە ئەوەگ مەوداگەی فراوانترەو بوود دۊای هەڵگیرسان جەنگ غەزە لە 7 تشرین یەکەم/ ئۆکتۆبەر 2023، تا حزبولڵای لوبنانی و گرووپەیل چەکدار عراقی سەر وە ئیران لەخوەی بگرێد، لە شان گرووپ ئەنسارولڵا (حوسییەیل) لە یەمەن، کە خریانە ناو رۊوەرۊبۊنەگە لەڕی پەلامارەیل لەبان ئیسرائیل و ئامانجگردن کەشتیوانی لە دەریای سوور.
لە عراق، چەمکەگە وەرد باڵەیل چەکداریگ پەیوەندیدار بۊ کە کار لەناوی ئەوەگ ناسریاگە وە "مقاوەمەی ئیسلامی لە عراق" کەن، کە پەلامارەیلیگ لەبان بنکەیل لەخوەیگر هێزەیل ئەمریکی لە عراق و سووریا جیوەجی کردن، بیجگە لە راگەیانن ئۆپەراسیۆنەیل لە دژ ئامانجەیل ئیسرائیلی، لە وەختیگ حکومەت عراقی وەردەوام بۊ لە دووپاتکردن رەتکردن ئەرا ئاڵشتکردن خاک وڵاتەگە ئەرا گۆڕەپانیگ ئەرا ململانێیەیل هەرێمی.
