حووسییەیل خەوەر دەن لە وەخوارخستن فڕۆکەیگ جەنگی سعودی لە جۊر "F15"
شەفەق نیوز- سەنعا
گرووپ حووسی لە یەمەن، ئمڕوو چوارشەممە، خەوەر دان کە هیزە چەکدارەیل سەروە پێیان فڕۆکەیگ جەنگی سعودی لە جۊر "F15" وەخوار خستنە ماوەی جیوەجیکردن کارەیلیگ کە وە دژمنکارانە وەسفی کرد لە ئاسمان پارێزگای مەئریب، وە دووپاتکردن ئەوەگ لە خود وەختەگە ئۆپەراسیۆن ریگری لە دوو پێکهاتەی جەنگی سعودی لە جۊرەیل "F15" و "تایفۆن" جیوەجی کردنە.
گرووپەگە لە بەیاننامەیگ رەسیە ئاژانس شەفەق نیوز وت، فڕۆکەوانی جەنگی سعودی ماوەی ئی هەفتەگە "فرەتر لە 450 پەلامار ئاسمانی" وە مدوو فڕۆکەیل "F15" و "تایفۆن" جیوەجی کردیە، کە لە هەردگ بنکەی خەمیس موشەیت و تائیفەو دەس وەپی کردنە، و پارێزگایەیل تەعز و لەحج و جەوف و حەججە و مەئریب و سەعدە و بەیزا کردنەسە ئامانج، ئەوەگ بۊە مدوو کوشیان و زەخمداربۊن شمارەیگ لە مەدەنییەیل.
هەمیش وت کە هیزە چەکدارەیلی تۊنستن فڕۆکەیگ سعودی لە جۊر "F15" وەخوار بخەن ماوەی جیوەجیکردن کارەیل دژمنکارانە ئەرا پشتگیری لە گردەوبۊنەیل سەربازی لە ئاسمان پارێزگای مەئریب، و ئاماژە دا ئەرا ئەوەگ وەخوارخستنی وە مووشەکیگ زەوی-ئاسمانی دروسکریاگ ناوخۆیی بۊە.
لەی باوەتەو، گرووپەگە وت کە هیزەیلی ئۆپەراسیۆنیگ ریگری لە دوو پێکهاتەی جەنگی سعودی لە جۊرەیل "F15" و "تایفۆن" لە ئاسمان مەئریب جیوەجی کردنە، وە وەکارهاوردن مووشەکەیل دروسکریاگ ناوخۆیی، و دیاری کرد کە هەردگ پێکهاتەگە وەدۊای جیماگەی ئەو فڕۆکە گەردینە کە وت وەخواری خستیە، و "ناچار کریانە گلەو بخوەن".
گرووپەگە دووپات کرد کە هیزەیلی "وەردەوام بوون لە پاریزگاریکردن لە ئاسمان وڵاتەگە و سەروەریی لە هەر دەسدریژی یا پێشێلکارییگ وە گشت ریەیل فەراهەمکریاگ"، وە دووپاتکردن تۊن لەبان ئەوەگ "ئاسمان یەمەن حەڵاڵ نییەکرێد ئەرا کەس".
لەباوەت تومەتەیل سعودی لەباوەت هەبۊن هەڕەشەیگ کە مەککەی پیرۆز بکەێدە ئامانج، بەیاننامەگە وت کە "ئەو بوختان و درووەیلە کە رژێم ئال سعود پروپاگەندە ئەرایان کەێد وە ئامانجگردن مەککەی پیرووز، مەحاڵە بڕوا وە کەسیگ بارێد"، و رەت بۊن هەر رخبارییگ لە یەمەنەو لەبان پیرووزییەیل کرد.
ودووپات کرد کە ئۆپەراسیۆنەیلی "دامەزراوە نەفتییەیل و بنکە سەربازییەیلی" کەێدە ئامانج، و "فرە دۊرە لە شوینە پیرووزەیل".
