جيگر ترمب: وەردەوام بویمن لە فشار لەبان ئیران
شەفەق نیوز- واشنتۆن
جی دی ڤانس، جیگر سەرۆک ئەمریکی، ئمڕوو شەممە، دووپات کرد کە ئەمریکا وەردەوام بوود لە زوورهاوردن لەبان ئیران، و یەیش لەناو گەرمەی گفتوگۆیل لەبان وازکردن گەروو هورمز.
ڤانس لە لێدوانیگ رووژنامەوانی کە ئاژانس شەفەق نیوز وەدۊای چگ، دیاری کرد کە "ئیران خەوەر داسە پیمان کە ری دەێد وە ئەوپەڕ رەوانبۊن نەفت لەڕی هورمز وەلی باوەڕ وەپی نیەکەیمن".
ڤانس دیاری کرد کە "ئیرانییەیل ئازار کیشن و خوازن کووتایی وە کارەگە بارن".
محمد باقر زولقەدر، ئەمیندار ئەنجومەن ئاسایش نەتەوەیی ئیرانی، ئیوارەی ئمڕوو شەممە، دووپات کرد، کە گەروو هورمز واز نیەکریەێد مەگەر ویلایەتە یەکگرتگەیل ئەمریکی رەفتار خوەی راسەو بکەێد.
زولقەدر لە لێدوانەیلیگ کە ئاژانس شەفەق نیوز وەدۊای چگ، هەمیش وت، کە بایەسە ویلایەتە یەکگرتگەیل "سزا زاڵمەیل" هەڵگرێد و قەرەبوو بیەێد و سامانە سڕکریاگەیل ئازاد بکەێد، و هەرلیوا گەمارۆی دەریایی هەڵگرێد و هیزەیل دەریایی و ئاسمانیی لە دەورگرد ئیران دەرکەێد.
لە وەختیگ زۊتر لە ئمڕوو، سوپای پاسداران ئیرانی، وازکردن گەروو هورمز بەسا وە رازیبۊن ویلایەتە یەکگرتگەیل وە مەرجەیل ئیران و دەسکیشانی لە دەسوەردان لە رێڕەو گفتوگۆیل هەرێمی.
یەیش لە وەختیگ تیەێد کە وەرپرسیگ ئەمریکی، راگەیان لە وەدەسهاوردن وەرەونواچگن لە گفتوگۆیل ناوەین ئیران و سەڵتەنەی عومان، لەناو تەقەلایەیلیگ لە واشنتن ئەرا کووتاییهاوردن وە نواگیریکردن سەربازی وەگەرد تاران و گلەوداین جۊلەی دەریایی ئەرا گەرووەگە.
