جۊلەی کەشتییەیل لە هورمز کەم کەێد.. تەنیا 7 کەشتی ماوەی یەک رووژ رەد بۊنە
شەفەق نیوز- خوەرهەڵات ناوڕاس
داتایەیل وەدۊاکەفتن کەشتییەیل، کە ئاژانس "رۆیتەرز" بڵاوی کرد، رووژ جمعە، نیشان دان کە جۊلەی کەشتییە بازرگانییەیل لەڕی گەروو هورمز کەم کردگە ئەرا 7 کەشتی، پەنجشەممە، لە وەراورد وەگەرد 11 کەشتی لە رووژ وەرجەلی، و فرە کەمتر لە ناوەنجی جۊلەگە ماوەی دە رووژ گوزەشتە، کە 15 کەشتی بۊە.
داتایەیل دیاری کردن کە تەنیا دوو کەشتی بازرگانی لە گەروو هورمز دەرچگن، رووژ پەنجشەممە، لە وەرانوەر چگن 5 کەشتی ئەرا ناو گەرووەگە.
لە وەرانوەر ئەوە، 26 کەشتی بازرگانی لە گەروو باب ئەلمەندەب رەد بۊن، وە شیوەیگ 10 کەشتی چگنەسە ناو گەرووەگە و 16 کەشتی لەلیەو دەرچگنە، لە وەراورد وەگەرد ناوەنجی نزیکەی 27 کەشتی رووژانە ماوەی دە رووژ گوزەشتە.
دەریایی سوپای پاسداران ئیرانی، ئێوارەی دۊکە پەنجشەممە، وت کە پەلامار بەلەمیگ بی سەرنشین ئەمریکی داگە لە وەردەم دەروازەی گەروو هورمز و "ئەرکە دەسدریژکارانەگەی شکست وەپی هاوردیمن".
وەپای ئاژانس "تەسنیم" ئیرانی، بەلەمەگە لەبان ئاوە و لە جۊر "سەیل درۆن ئێکسپلۆرەر"ە کە دریژییەگەی نزیکەی 7 مەترە، و توانای بەرزیگ دیرێد ئەرا مەنین لە دەریا، و ئامادە کریاگە وە کامێرا و سیستەمەیل پەیوەندی و ئامێرەیل هەستپیکەر جیاجیا ئەرا جیوەجیکردن ئەرکەیل چەودیاری و هەواڵگری و بەرزەوکردن زانیاری لە بوار دەریایی.
لە وەختیگ گوزەشتە لە دۊکە، فەرماندەیی ناوەندی ئەمریکی "سێنتکۆم"، خەوەردا لە ئاڵشتکردن رێڕەو 96 کەشتی بازرگانی ئەرا مسۆگەرکردن پابەندبۊن تەواو وە کۆتوبەندەیل لە وەخت نووەوکردن گەمارۆ دەریایی لەبان ئیران لە 14 تەموز/ یۆلیۆی گوزەشتەو.
ئی پیشهاتەیلە هاوەختە وەگەرد فراوانبۊن بازنەی رۊوەڕۊبۊن دەریایی لەناوەین ویلایەتە یەکگرتگەیل و ئیران، تا جۊلەی دەریاوانی و دابینکردنەیل وزە وە شیوەیگ زیایبۊ بچنە ناو بازنەی ئاڵووزییەیل، لەناوەین گورزەیل و کردنە ئامانجەیل کە رەسینە بان کەشتییە هەڵگرەیل نەفت و کەشتییەیل لە کەنداو و دەورگەرد گەروو هورمز.
