تمەن وەردەوامە لە داوەزین.. دۆلار لە 270 هەزار رەد کەێد سەرەڕای دەسوەردان ناوەندی

شەفەق نیوز- تاران

تمەن ئیرانی، رووژ یەکشەممە، وەردەوام بۊ لە داوەزین وەرانوەر دۆلار، کە لە 270 هەزار تمەن لە بازاڕ ئازاد رەد کرد، سەرەڕای دەسوەپیکردن بانک ناوەندی وە جیوەجیکردن پلانیگ ئەرا خستنەڕۊ بڕیگ کە رەسێدە دوو ملیار دۆلار ئەرا پاڵپشتیکردن دراو ناوخۆیی.

 وەپەی داتایەیل تایبەت وە نرخەیل، کە ئاژانس شەفەق نیوز چەوی وەپیان کەفتگە، نرخ فرووشتن دۆلار رەسیە 270,950 تمەن، لە وەرانوەر 268,250 تمەن ئەرا سەنن، لە نووەوکردن سەعات یانزەی شەوەکی وە وەخت تاران، وە بەرزەوبۊنیگ وە بڕ 1,450 تمەن، یا 0.54%، لە وەراورد وە نرخەگەی کە 269,500 تمەن بۊ لە رووژ وەرجە خوەی.

 داتایەیل نیشان دەن کە نرخ دۆلار وە تمەن وە نزیکەی 14.79% لە ماوەی هەفتەیگ بەرزەو بۊە، و 74.75% لە ماوەی شەش مانگ.

و بانک ناوەندی ئیرانی، چوارشەممەی گوزەشتە، پلانیگ راگەیانۊ ئەرا خستنەڕۊ بڕیگ کە رەسێدە دوو ملیار دۆلار وە کاش لە بازاڕ، کە دەس وەپێ کەێد وە قۆناغ یەکەم وە بڕ یەک ملیار دۆلار لەڕی لقەیل هەڵوژریاگ ئەرا بانکەیل و نووسینگەیل دراو.

هەمیش ئاست سەنن دراوە بیگانەیل وە کارت نیشتمانی ئەرا دە هەزار دۆلار بەرزەو کرد ئەرا ئەو هاووڵاتییەیلە کە لە تەمەن هەژدە ساڵ رەد کردنە.

 ئی داوەزین دراوە لە ناوڕاس زوورەیل سزایەیل ئەمریکی و گەمارۆ دەریایی تیەێد کە کۆت و بەن خەێدە بان هەناردەیل نەفت، کە یەکیگە لە گرنگترین سەرچەوەیل دراو بیگانە ئەرا ئیران.

 مەهدی دارابی، راوێژکار پارێزگار بانک ناوەندی ئەرا کارەیل دراو بیگانە، لایەنیگ لەی داوەزیانە گلەو دا ئەرا لێدوانەیل وەرپرسەیل ئەمریکی لەباوەت رمیان ئابووری ئیرانی، وە دانان ئەوەگ کاریگەری کەنە بان بازاڕ دراو، و باس داوەزین دراوەگە وە وەختانە کرد.

 قەیران دراو هاودەمە وەرد بەرزەوبۊنیگ تیژ لە نرخەیل، چۊنکە داتایەیل ناوەند ئامار ئیرانی ئەرا مانگ شەهریوەر، کە لە ئەیلول/ سێپتەمبەر کووتایی تیەێد، نیشان دان کە نرخەیل وەکاربەرەیل وە رێژەی 89.8% لە وەراورد وە خود مانگ لە ساڵ وەرجە خوەی بەرزەو بۊنە، لە وەختیگ ناوەنجی هەڵاوسان ساڵانە رەسیە 73.6%، و هەڵاوسان مانگانە 4.2%، وەپەی ئەوەگ ئاژانس "تەسنیم" ئیرانی بڵاوی کرد.