ترەمپ چەوەڕي دابینکردن دارایی کەێد.. کۆنگرێس بەشەو بوود لە ناوەین "بەسانن حکومەت" و جەنگ لەبان ئیران
شەفەق نیوز - واشنتۆن
ماڵپەڕ "CNBC عەرەبی" خەوەر دا کە نۊنەرەیل ئەمریکی لە هەردوگ حیزب دیموکرات و کۆماری، هوشداری دان لە ئەگەر چگن کۆنگرێس ئەمریکی وەرەو بەسانن حکومەت وەرجە جەژن زایینی، کە بوودە هووکار پەکخستن داواکاری سەرۆک دۆناڵد ترەمپ ئەرا تەرخانکردن 350 ملیار دۆلار زیاتر ئەرا وەزارەت بەرگری "پنتاگۆن"، ئەرا جەنگ لەبان ئیران.
ئاشکرا کرد کە کۆمارییەیل و دیموکراتەیل تەقەڵا دەن ئەرا رەسین وە ریککەفتنیگ لەباوەت ریکاریگ وەختانە ئەرا دابینکردن دارایی پرۆسە حکومەتییەیل تا سەرەتای ساڵ ئایەندە، وەختیگ دیموکراتەیل کۆنترۆڵکردن هەردوگ ئەنجومەن پیران و نۊنەرەیل گرنە دەس دۊای سەرکەفتنیان لە هەڵوژاردنەیل نووەوکردن نیمەیی کۆنگرێس کە لەی تشرین دۊیەم/ نۆڤەمبەرە وەڕیەو چگ.
دیاری کرد کە هەردوگ حیزبەگە ئومیدوارن وە پەسەنکردن بڕیگ لە پڕۆژە یاسایەیل خەرجکردن کە تەواو ساڵەگە پووشنەو لە ماوەی خول ئیسەیی کۆنگرێس، ئەرا دابینکردن دارایی کەرتەیلیگ لە حکومەت تا کۆتایی ساڵ دارایی ئیسە لە 30 ئەیلول/ سێپتێمبەر گوزەشتە.
و ماڵپەڕەگە زیای کرد کە کۆمارییەیل تەقەلا دەن دیموکراتەیل وە شیوەیگ نیشان بەن کە ئامادەن ئەرا بۊنە هووکار چوارەمین بەسانن بەشەکی ئەرا حکومەت لە ماوەی خول دۊەم ترەمپ، و وتن کە دیموکراتەیل ئامادە نەۊنە ئەرا دانوسەنکردن لەباوەت پاکێج دابینکردن داراییەگە وەرجە هەڵوژاردنەیل سەرکردایەتی حیزبەگە کە بڕیارە لە یەکەم کانوون یەکەم/ دیسەمبەر ئایەندە بکریەێد، کە لەناوی سەرۆک دیموکراتەیل لە ئەنجومەن پیران چاک شومەر و سیناتۆر کریس ڤان هۆڵن رکابەری کەن.
لەی باوەتەو، سەرۆک زۆرینەی کۆماری لە ئەنجومەن پیران جۆن ثون ئەرا رووژنامەوانەیل لەی هەفتە وت: "گەل ئەمریکی هەوەجە وە بەسانن حکومەتییگ ترەک نەیرێد، باوەڕ دیرم کە ئەوە هەڵەیگ گەورە و سووکایەتییگ راسی بوود ئەرا گەل ئی وڵاتە".
لە وەختیگ سیناتۆر دیموکراتی پیتەر وێڵش، لە ویلایەت ڤێرمۆنت، دووپات کرد کە "گەورەترین ریگر ئەوەسە کە ئیمە نیەخوازیمن دارایی ئەرا جەنگ دابین بکەیمن، و نیەخوازیمن کۆتایی وەپی باریمن، ئەی چۊن ئی کێشە چارەسەر بکەیمن؟.. یە کێشە سەخت و چارەسەرنەکریاگەگەس".
لەوەرانوەر یاسادانەرەیل تەنیا سێ هەفتە مەنگە ئەرا رەسین وە ریککەفتنیگ کە گەرەنتی وەردەوامبۊن کار ئاژانسە فیدراڵییەیل بکەێد دۊای 11 کانوون یەکەم/ دیسەمبەر ئایەندە، کە وادەی کۆتاییهاتن دابینکردن دارایی ئیسەس.
وەرد نزیکەوبۊن پشوو جەژن سوپاسگوزاری کە هەفتەیگ وەردەوام بوود، هێمان ناکۆکییەیل فراوانن لە ناوەین هەردوگ حیزبەگە، وە تایوەت لە ئەنجومەن پیران کە 100 کورسی لەخوەی گرێد، وەختیگ پەسەنکردن پاکێج دابینکردن داراییەگە هەوەجە وە دەسخستن 60 دەنگ دیرێد، وەپەی ئاژانس "رۆیتەرز".
جی باسە کە دیموکراتەیل لە گوزەشتە بۊنە هووکار سێ بەسانن حکومەتی لەو وەختەو کە ترەمپ گلەو خواردیە ئەرا دەسەڵات لە کانوون دۊەم/ یەنایەر 2025، کە لە ناویان دریژترین بەسانن حکومەتی فراوان بۊ لە مێژوو وڵاتەیل یەکگرتگ.
هەمیش دابینکردن دارایی ئەرا وەزارەت ئاسایش ناوخۆیی لە وەختیگ گوزەشتە لەی ساڵە وسانن، دۊای ئەوەگ ئەندامەیلیگ لە ئیدارەی کووچ فیدراڵی دوو هاووڵاتی ئەمریکی وە گولە کوشتن لە شار مینیاپۆلیس.