ترەمپ پیشنیار ئیرانی رەت کەێد و دووپات کەێد: گەروو هورمز ها ژیر دەس ئیمە
شەفەق نیوز- واشنتۆن
دۆناڵد ترەمپ، سەرۆک ئەمریکی، رووژ شەممە، راگەیان لە رەتکردن پیشنیار ئیرانی لەباوەت سەرلەنوو وازکردن گەروو هورمز، وە دووپاتکردن ئەوەگ وڵاتە یەکگرتگەیل کۆنترۆڵ وە شیوەیگ تەواو لەبان گەرووەگە کەێد.
ترەمپ لە قسەیلیگ کە ئاژانس شەفەق نیوز وەدۊای چگ، وت کە 29 کەشتی ماوەی شەو گوزەشتە لەلی رەد بۊنە، وە دیاریکردن ئەوە کە بڕەیل فرە گەورایگ لە نەفت لەڕییەوە رەد بوون.
وتیش کە ئیران داوای سەرلەنوو وازکردن گەرووەگە دەسوەجێ کەێد وە مدوو زەرەدەیلی، و دیاری کرد کە تاران خوەی خستیەسە ناو تەنگانەیگ وە بەساننی، و ئەوەگ وڵاتە یەکگرتگەیل "گەوراترین گەمارۆ لە میژوو سەربازی" لەبانی چەسپانیە.
ترەمپ دیاری کرد، کە ئیران خوازێد وە رێککەفتنیگ بڕەسێد، و دووپاتکرد کە وڵاتە یەکگرتگەیل دیواریگ لە پۆڵا لە دەورگرد گەروو هورمز چەسپانیە، وەگورەی قسەی خوەی.
جی باسە کە سەرۆک ئیرانی مەسعود پزیشکیان دووپات کرد، لە مەوقەیگ زۊتر لە ئمڕوو شەممە، کە ئەو پلان نووە کە تاران پیشنیاری کردگە ئەرا سەرلەنوو وازکردن گەروو هورمز ستراتیژی، وە "هەماهەنگی" وەرد ریبەر ئیرانی موجتەبا خامنەیی نریایە، وە دیاریکردن ئەوەگ جیوەجیکردنی رۊوەڕۊ "هیچ کیشەیگ" نیەوود لە ئەگەر رازیبۊن وڵاتە یەکگرتگەیل لەبان پیشنیارەگە.
پزیشکیان لە دیداریگ وەرد توڕ "سی بی ئێس" وت، کە "هەماهەنگییەگە وەرد سەرکردەی شۆڕش کریا، و ئەگەر وڵاتە یەکگرتگەیل رازی بوود لەبان پلانەگە و پابەندبۊنەیلی جیوەجی بکەێد، ئەوە ئیمەیش خود کار کەیمن، و هیچ کیشەیگ لەی باوەتە نیەوود".
هەمیش ئاشکرای دروسکردن تیمیگ شەش ئەندام کرد، کە نۊنەرەیل لە رێکخراو و دەسەیل جیاواز لەخوەی گرێد، کە سوپا و پەرلەمان و حکومەت لەناویانڵ، ئەرا وەدۊاچگن ئەو پرسەیلە کە بەسیانەسەو وە پلانەگە.
