تالبان بڕیار نوویگ لەباوەت گەشتکردن دەێد

شەفەق نیوز/ وە بڕیار حکومەت تاڵیبان فڕۆکەخانەیل ئەفغانستان ری وە دۊتەیل و ژنەیلە نەێد وە تەنیا گەشت بکەن و بایەت کەسوکار خوەیان لە رەگەز نیر وەگەردیان بوود. 

وەگەرد دەسناین وەبان دەسڵات وەلایەن تاڵیبان، وەردەوام ریگری نوو وەبان ئازادییەیل دانانە وە تایبەتیش ئازادی تاکە کەسی خانمەیل ئەفغانی. 

لە نووترین بڕیار حکومەت تاڵیبان، دانان مەرج بۊ ئەرا گەشتکردن خانمەیل، ک وەگورەی بڕیارەگە، هۊچ دۊت و ژنیگ ئەفغانی ئەرای نییە وەبی ئەندامیگ خانەوادەگەی گەشت بکەێد، ئەو کەسەیش ئەرا گەشتەگە وەگەردیا چێد، بایەت لە رەگەز نیر بوود. 

یەکیگ تر لەو بڕیارە ئەڵاجیوەیل تاڵیبان ک لەی هەفتە  دەریکرد، بڕیار جیاکردن پارکەیل بۊ، وەگورەی بڕیارەگە ژنەیل و پیاوەیل نیەوود وەگەرد یەک بچنە پارک و رووژەیل سەردان کردن پارکەیل ئەرا خانمەیل جیا کریەێدەو.