تەقینەوەیگ لەناو مەکتەویگ لە دەوروگەرد حەسەکە گیان مناڵیگ سەند و ٩ کەس ترەک زەخمدار کرد

شەفەق نیوز- حەسەکە

مناڵیگ گیان لەدەسدا و نۆ کەس ترەک لەوناویان مامۆستایگ، ئمڕوو چوارشەممە، لە ئەنجام تەقینەوەی مین لەناو مەکتەو "المحدثة" لە شارۆچکەی زڕگان (ئەبو راسین) لە دەوروگەرد باکور حەسەکە زەخمداربوین.

سەرچەوەیگ پزیشکی ئەرا پەیامنێر شەفەق نیوز وت: تەقینەوەگە لەناو مەکتەویگ رویدا، کە بویە مدوو کوشیان مناڵیگ وە ناو ئەحمەد سنجار، وەگەرد زەخمداری خوەنەوارەیل و مامۆستایگ، وە تیمەیل فریاکەفتن زەخمدارەیل ئەرا خەسەخانەیل شارۆچکەی تل تەمر و شار حەسەکە کلکردن ئەرا وەرگردن دەرمان.

دیاریکرد، فرەیگیان زەخمداریان سوکە، ریداوەگە نیگەرانی لەناو هاوڵاتیەیل دروسکردیە، وە تایوەت کە تەقینەوەگە لەناو دامەزراوەیگ فێرکاری رویدایە کە بایەس شوینیگ بی وەی بوود ئەرا مناڵەیل.