بەرزەوبۊن کەمیگ لە نرخەیل نەفت لە ناو لەرزین دابینکردن لە خوەرهەڵات ناوڕاس

شەفەق نیوز - بەغداد

نرخەیل نەفت ئمڕوو جمعە کەمیگ بەرزەو بۊن، دۊای وسانن هەناردەیل سزەمەنی لەلایەن چینەو، لە وەختیگ رووژنامەی "وۆڵ ستریت جۆرناڵ" خەوەردا کە وڵاتە یەکگرتگەیل هاز زیاتر و کەشتییگ فڕۆکەهەڵگر کل کەێدە خوەرهەڵات ناوڕاس، لە وەختیگ هەمیش تەقەلا دەێد زوور بخەێدە بان ئەوروپا ئەرا کیشانن فرەتر لە یەدەگ دیزڵ.

 نرخ نەفت خاو برێنت 29 سەنت یا 0.28 لەسەد بەرزەو بۊ ئەرا 102.60 دۆلار ئەرا هەر بەرمیلیگ. و نرخ خاو وێست تێکساس ناوەندی ئەمریکی 27 سەنت یا 0.29 لەسەد زیای کرد ئەرا 93.14 دۆلار.

 برێنت لەوەخت یەکلاییکردن لە دانیشتن گوزەشتە وە فرەتر لە چوار دۆلار و خاو ئەمریکی وە زیاتر لە دوو دۆلار بەرزەو بۊن لەدۊای راپۆرت وۆڵ ستریت جۆرناڵ و هەواڵەیل لەباوەت هەناردەیل چینی کە رخ خستە دڵ لە خەراوتربۊن کەمبۊن سزەمەنی لە ئاست جەهان.

و برێنت وەرەو تۊشهاتن وە زەرەدیگ هەفتانەس وە رێژەی 1.93 لەسەد دۊای وەدەسهاوردن دەسکەفتەیل گشتی کە رەسیە 14 لەسەد لە ئەیلول/ سێپتەمبەر، و خاو ئەمریکی تەنیا چوار لەسەد لە مانگ گوزەشتە وەدەس هاورد.

 تیم واتەرەر، گەورە شیەوکەر لە کۆمپانیای کەی.سی.ئێم. ترەید وت "بازاڕەگە هەڵسەنگاندن ئەرا بڕیگ لە نشانەیل جیاواز ئی هەفتە کەێد"، وە دیاریکردن ئەوەگ مامەڵەکارەیل "پشوویگ کوڵ گرن" دۊای لەرزینەیل دۊکە پەنجشەممە.

 وتیش "دیمەن ئەرێنی تا رادەیگ ئەرا هەناردەیل سعودیە لەناودریەێد وە راپۆرتەیل لەباوەت رویکردن کەشتییگ تریگ فڕۆکەهەڵگر ئەمریکی وەرەو کەنداو، و بڕیار چین ئەرا سنووردارکردن هەناردەیل بەرهەمە پاڵفتەکریاگەیل".

 وۆڵ ستریت جۆرناڵ دیاری کرد کە وڵاتە یەکگرتگەیل سێیەمین کەشتی فڕۆکەهەڵگر و تا 10 هەزار سەرباز زیایەگی کل کەێدە خوەرهەڵات ناوڕاس، لە وەختیگ سەرۆک دۆناڵد ترەمپ لێکۆڵینەوە کەێد لە توانای دووارە دەسکردن وە گورزەیل لەبان ئیران دۊای هەڵوژاردنەیل نیمەی خول لە ئەمریکا.

 ترەمپ ئەرا رووژنامەنویسەیل لە کۆشک چەرمگ وت "ئیسە بایەسە بڕیاریگ بیەم. یا بایەسە رێککەفتنیگ فرە دادپەروەرانە واژوو بکەن، یا دۊای یە بوونیگ ئەرایان نیەمێنێد".

 راپۆرتەیل لەباوەت چەسپانن قەیەغەی چین لەبان هەناردەکردن سزەمەنی شلە، ترس لە بازاڕەگە دروس کرد دۊکە.

پەکین سنووردارکردن لەبان هەناردەیل سووتەمەنی لە ئازار/ مارس چەسپان دۊای هەڵایسان جەنگ ئەمریکی-ئیسرائیلی لەبان ئیران، و دۊاتر ئی سنووردارکردنەیلە لە تەمووز/ یۆلیۆ سووکەو کرد، و ئیسە بارەیل دیزڵ و بەنزین و سزەمەنی فڕۆکەیل وە بنەمای مانگانە رێکخڵێد.

سەرچەوەیل دیاری کردن کە چین دۊکە پەنجشەممە دەس کردە پشوویگ کە ئەرا ماوەی هەفتەیگ وەردەوام بوود بی ئەوەگ گڵۆپ سەوز بەێدە کۆمپانیایل گەورای پاڵاوتن ئەرا بارکردن هەناردەیلیان وەرەو ناوچەیل ترەک بیجگە لە هۆنگ کۆنگ و ماکاو لە تشرین یەکەم/ ئۆکتۆبەر.

ئاشکرا نەۊە ئایا پەکین دەس کەێدەو وە ریداین وە کۆمپانیایل پاڵاوتن ئەرا هەناردەکردن دۊای کووتاییهاتن پشوو لە هەفت مانگ ئیسە.

 سێ سەرچەوە خەوەر دان کە ئیدارەی ترەمپ داوا لە ئەڵمانیا و فەڕەنسا کردگە لە ئەممارە یەدەگەیل دیزڵ بکیشنن ئەرا دەسمیەتیداین لە کەمەوکردن بەرزەوبۊن نرخەیل سزەمەنی جەهانی، وەنە تویش قەیەغەیگ ئەگەری لە هاوردەکردن دیزڵ لە وڵاتە یەکگرتگەیل بوونەو.

 سەرچەوەیگ ئەرا ئاژانس "رۆیتەرز" وت کە وڵاتە یەکگرتگەیل داوا لە یەکێتی ئەوروپا کردگە 120 مەلیۆن بەرمیل لە دیزڵ لە ماوەی شەش مانگ ئایندە بکیشێد.

 دەوڵەتەیل یەکێتی ئەوروپا نزیکەی 109 مەلیۆن تەن لە ئەممار یەدەگەیل نەفت خاو و سزەمەنی پارێزن کە تەرخان کریاگە ئەرا رەوشەیل لەناکاو (فریاکەفتن).