ئامانجگردن کەشتییگ لە کەنداو و ئیران لەیەکەوداین 5 کەشتی نەغتهەڵگر وە مینەیل لە هورمز راگەینێد
شەفەق نیوز - لەندەن/ تاران
دەسەی ئۆپەراسیۆنەیل بازرگانی دەریایی بەریتانی، رووژ یەکشەممە، خەوەردا لە وەرگردن ئاگادارکردنیگ لە دەسەڵاتەیل بارکردن هندییەو لەباوەت وەرکەفتن کەشتییگ ئەرا پەلاماریگ لە مەوقەی دەریاوانیی وەرەو خوەرهەڵات لەڕی کەنداو عەرەبی، وەرجە چگنی ئەرا ناو تەنگەی هورمز، وە دووپاتکردن بیوەیی گشت ئەندامەیل ستافەگەی.
دەسەگە لە بەیاننامەیگ کە ئاژانس شەفەق نیوز چەوی پی کەفت، دیاری کرد کە قەوارەی ئەو زیانەیلە کە رەسینەسە کەشتییەگە، لە شان دەرەنجامە ژینگەییە چەوەڕیکریاگەیل ئەرا رۊداوەگە، هێمان تا ئیسە نادیارە.
لە وەرانوەر، تەلەفزیۆن ئیرانی راگەیان وە وەیەکەوژیان 5 کەشتی نەفتهەڵگر وە مینەیل لە تەنگەی هورمز و هەڵسیان ئاگر لەناوی، لە ماوەی 48 سەعات گوزەشتە.
جی باسە کە رووژنامەی "وۆڵ ستریت جۆرناڵ" شەوەکی ئمڕوو یەکشەممە، ئاشکرای کردگە کە سەرۆک وڵاتەیل یەکگرتگ ئەمریکی دۆناڵد ترەمپ وەردەوامە لە زوورهاوردن وە بان ئیران وە گەمارۆ و سزایەیل لە ناوڕاس گفتوگۆیەیل لەناو ئیدارەی لەباوەت دەسکردن وە گورزە سەربازییەیل.
یەیش هاووەخت وەرد ئەوە نیەێد کە سێ سەرچەوەی ئاگادار دۊکە شەممە ئاشکرا کردن کە ترەمپ لە ماوەی رووژەیل کەم گوزەشتە گەورە راوێژکارەیلی ئاگادار کردگە کە شایەد واز بارێد لە پەلامارداین ئیران ئەگەر وڵاتەیل یەکگرتگ رۊوەرۊی هەر چزداینیگ نوو نەوود لە تاران یا حووسییە هاوپەیمانەیل وەردی لە یەمەنەو، وەپەی ئەوەگ ئاژانس "رۆیتەرز" ئەرا دەنگوباسەیل دیاری کرد.
