ئاماریگ دڵشکن.. کۆڕۆنا گیان یەک مەلیۆن کەس لە جەهان رفان
شەفەق نیوز/ خانمە وەرپرسیگ پایەدار لە ریخریاگ تەندروسی جەهانی وت: ئەو مەوقە هاتیە ک وە شیوەیگ ڕاستەقینە دووارە بنووڕیمنە پەتای کۆڤید-١٩، ئەوەیش دویای توومارکردن یەک مەلیۆن مردن وەی بیماریە ئمساڵ.
ماریا فان کیرخۆف خانمە سەرۆک تیم تەکنیکی ک پەیوەندی وە کۆڤید-١٩ دیرێد لەناو ریخریایەگە وت: ئی ئامارە دڵ شکنێد، چوینکە تاقیکردن و دەرمان وواکسینەیل و ریکارەیل تەندروسی گشتی ئەرا لەناوبردن ڤایرۆسەگە گشتی هەس.
وتیش: ئیمە ک ئیسە هایمنە ناو سێیەم ساڵ پەتاگە، کارەگە فرەتر خەفەتباریە ک ئیمە ئەو چشتەیلە دیریمن تا نەیلیمن ئی مردنەیلە بوون.
وتیش: فرە کەس لەلەیمان لە وەرانوەر شمارەیل تویش تەزیان هاتیە، وتیش؛ بایەتە وەشیوەیگ راستەقینە بنووڕیمن، وە ڕاسی هەڵسەنگاندن خوازیمن ک ئیمە هایمنە کوو، نەبایەت بکەفیمنە هەڵوێست مردن لە ١٤ هەزار تا ١٥ هەزار کەس هەر هەفتەیگ.
ماریا وتیش: هیمان پەتاگە تەواو نەویە، باوجی توەنیمن سنووری ئەرای دانەیمن، لە وەختیگ مەردمەگە هانە ناو ژیان رووژانەی خوەیان.
هوشداری کرد ک یەک مەلیۆن مردن لەی ساڵە وەیەکەوژیان نییە وەرد کۆڤید-١٩، و ١٥ هەزار مردن لە هەفتەیگ شیوەیگ وەرپرسانە نییە لە رەفتارکردن وەگەرد پەتاگە.
ماریا هەمیش وت: ئی شمارەیل گەپە، ک لە راسیەگە کەمترە، چوینکە تاقیکردنیل ناو ماڵەیل نیەکەفنە ناو ئامار فەرمی، وتیش: نووڕیمن ک ئی ڤایرۆسە وە شیوەی فرەیگ لە جەهان بڵاو بوو، و داخەو ک ئی ڤایرۆسە واز لەلیمان نیارێد.
