ئاشکراکردن شناسنامەی ئەو بازیگەرە لە پەرشەلۆنە ک تووش کۆڕۆنا هاتگە

شەفەق نیوز/ جەماوەر پەرشەلۆنە، ئمڕوو چوارشەممە، خەوەر دڵتەزنیگ وەرگرد، دویای ئاشکراکردن تووشهاتن یەکیگ لە بازیگەرەیل تیمەگە وە ڤایرۆس کۆڕۆنا، وەرجە روی وەڕوبینە چەوڕیکریایەگەی رووژ جمعەی ئایندە، لەنوای بایرین میونیخ، لە چارەک کۆتایی دەوری پالەوانەیل ئۆڕوپا.
یانەگە لەبەیاننامەگەی ئاشکرای ناو بازیگەرە تووشهاتگەگە نەکرد، بەڵکم دووپاتکرد ک تیکڵای بازیگەرەیل تیمە یەکەمینەگەی نەویە، ک سەرسام جەماوەرەگە کرد.
لەلای خوەییش رۆژنامەی ''مۆندو دیبورتیڤۆ'' ئاشکرای شناسنامەی بازیگەرەگە کرد، ک دووپات کرد خوەی جان کلێر تودیبۆ فەڕەنسیە، ئەوەگ لە وەرز گوزەیشتە جوور وەختانە لەناو شالکەی ئەڵمانی بوی.
هەمیش بازیگەرە گەنجەگە خوەی دەرچگ ئەرا ئاشکراکردن تووشهاتنی وەڤایرۆسەگە، ئەویش لەڕی ماڵپەرەگەی خوەی لەبان تویتەر.
تۆدیبۆ لەرووژەیل ئایندە بەشداری نێکەێد لە راهێنانەگان، چوونکە بایەسە لە کەرنتین ماڵی بوود تا ئەوەنە لەپەتاگە خاسەوبوود.