ئاسمان سوور و هوشداری.. ئاگر هەڕەشەی هەزاران کەس دەێد لە باشوور ئەمریکا

شەفەق نیوز/ ڕاپۆرتە ئەمریکییەیل، ئمڕوو چوارشەممە، راگەیانن کە فەرمان و هوشداری دەرچگە ئەرا چووڵکردنی هەزاران دانیشتگەیل باشوور کالیفۆرنیا، لە وەختیگ ئاگرکپەوکەرەیل جەنگ وەرد ئاگر دارستانیگ کەن کە وا هیزی دەێد  لە شار مالیبو کە لە نزیک کۆشکەیل روی زەریا و زانکۆی پیپەرداین هیز گرد.

 خوەنەوارەیل نووڕنە بڵویزەی ئاگرەگە کە وەناو دووڵەیل بڵاو بوینە و ئاسمان مالیبو سوورەو کردیە.

 ئەنتۆنی سی مارۆن، وەرپرس بەش ئاگرکپەوکردن ویلایەت لۆس ئەنجلۆس وت: "شمارەی کەمیگ" لە ماڵەیل سزیانە، بەڵام شمارەی هویردییگ نەزانستنە.

 فۆتۆگرافەریگ ئەسۆشێتد پرێس نووڕیە کە  گوڵپەی ئاگر لە دەورگرد ماڵیگ  لەلای کەمەو هیز گردیە.

 ئاگرەگە هەڕەشەی زیاتر لە هەشت هەزار و 100 ماڵ و باڵەخانەیل ترەک دا، لەناویان نزیکەی دوو هەزار ماڵ کە فەرمان چووڵکردنیان دریا.

 شەش هەزار کەس ترەک ئاگادارکریان کە لە هەر وەختیگ خوەیان ئامادە بکەن ئەرا چووڵکردن، وەگەرد وەرگردن ئاگاداری، چوینکە وا لە شار سانتا ئانا وە تونی تا ٦٤ کیلۆمەترە و لەوەر ئەوە ئاگرەگە وە چەن لاییگەو بڵاو بویە.

وەزوی ئاشکرا نەویە کە چوین ئاگرەگە کە ناوی "ئاگر فرانکلین"ە دەسوەپی کردگە، بەڵام وەرپرسەیل وەڕێوەبەرایەتی ئاگرکپەوکردن ناوچەی لۆس ئەنجلۆس مەزەنە کردن کە ئاگرەگە لەلای کەمەو ١٠٠ دۆنم (٤٠ هێکتار) سزانیە و رخداری لەبان چەن بینایگ دروس کردگە.

 نویسینگەی لۆس ئەنجلۆس لە دەزگای کەشناسی نیشتمانی راگەیان کە مەزەنە کریەێد تونی وای باکوور وەرەو باکوور خوەرهەڵات لە ٣٠ تا ٤٠ میل (٤٨ بۆ ٦٤ کیلۆمەتر) لە ساعەتیگ بەرزەو بوود.

 نویسینگەگە هوشدارییگ سوور لەبان رخداری ئاگر گەورە بڵاوکرد، یەیش لەوەر رووشنایی "رەوشیگ دەگمەن رخدار".

 وەڕێوەبەرایەتی ئاگرکپەوکردن فەرمان چووڵکردن ناچاری ئەرا ئەو دانیشتگەیلە دەرکرد کە لە خوەرهەڵات ری مالیبو کانیۆن و باشوور ری پیوما ژیەن.