گابریێل.. زریان سەختیگ دەێد لە نیوزلاند و هەزاران کەس دەروەدەر کەێد
2023-02-14T15:03:56+00:00
شەفەق نیوز/ حکومەت نیوزلاند، ئمڕوو سێشەممە، ئامادەباشی لە گشت وڵاتەگە راگەیان، لەوەر زریان سەختیگ ک زیاتر لە ١٠٠ هەزار کەس لە کارەبا بیبەش کرد، و بویە هوکار لافاو و خورمیان زەوی.
دەسەڵاتەیل وتن: ئی کەشوهەوای ناکاویە شەو دووشەممە لەبان سێشەممە وە وای تونیگ واران رفتیگ لەبان دوورگەی باکوور دەسوەپی کرد.
لە کۆنگرەیگ رووژنامەوانی لە ئۆکلاند، کریس هیبکینز سەرۆک وەزیرەیل وت: ویرانیەگە فراوان لە گشت ناوچەیل وڵاتەگە، وتیش: خانەوادەیل فرەیگ ئاوارە بوین و ماڵەیل فرەیگ لە کارەبا بیبەش بوینە.
بڕیگ لە ماڵەیل دار رمیا بانیان یا لافاو خەڕگ کەفتە ناویان، و خورمیان زەوی و لافاوەیل ریوبانەیل بڕین.
وەگورەی میدیایل راگەیانن ناوخوەیی، فرە لە خەڵکەگە ناچار بوین لەماڵ خوەیان وەمەلەوانی بچنە دەیشت.
