ئاگادارکردن نوویگ لەباوەت کەفتن کەشتییگ بارهەڵگر لە هورمز لە وەر پەلامار
شەفەق نیوز- وەدۊاچگن
دەسەی پرۆسەیل بازرگانی دەریایی بەریتانی، ئمڕوو شەممە، خەوەردا لە وەرگردن خەوەریگ لە کەشتییگ بارهەڵگر کە ئویشێد تۊش پەلامار وە گولەیگ هاتگە لەوەخت دەریاچگنی لە گەروو هورمز.
دەسەگە دیاری کرد، وەپای رۆیتەرز، کە ئەو گولە داگەسە پەیکەر کەشتیەگە، وە بی ئەوەگ لە خەوەرە سەرەتاییەگە قەوارەی زەرەدەیل ئاشکرا بکەێد یا ئەگەر رۊداوەگە بۊەسە مدوو زەخمداربۊن لەناو ئەندامەیل تیمەگە.
رۊداوەگە لە سای وەردەوامبۊن ئاڵووزییە ئەمنییەیل لە گەروو هورمز تیەێد، کە لەماوەی مانگەیل گوزەشتە رۊداوەیل ئامانجگردن و زەرەدەیل وەخوەی دی کە رەسیەسە کەشتییە بازرگانییەیل، کە یەیش بۊەسە مدوو داوەزیان جۊلەی دەریاچگنی وە شبوەیگ گەورە.
دەسەگە، دۊکە جمعە، ئاشکرای شمارەیلیگ کرد کە تۊنریەێد شۆککەر باسیان بکریەێد لەباوەت جۊلەی دەریاچگنی لە گەروو هورمز، کە ریژەی رەدبۊن 17% لە ئاست وەرجە جەنگەگە لەماوەی رووژەیل گوزەشتە رەد نەکردگە.
وەپای راپۆرت دەرچگ لە دەسەگە، تەنیا 151 کەشتی لەو رێڕەو ئاوی تەنگە رەد بۊنە، وە چگنەناو یا دەرچگن، لەماوەی هەفت رووژ.
هەمیش دەسەگە 56 خەوەر توومار کردگە لەباوەت زەرەدەیلیگ کە رەسینەسە کەشتییەیل لە گەروو هورمز و ئاوەیل هاوسای لەوەخت سەرهەڵداین جەنگ ئەمریکی ئیرانی لە 28 شوبات، وەلی ئی ئامارە ئەو دوو پەلامار دۊاییە لەخوەی نیەگرێد کە پەنجشەممەی گوزەشتە خەوەریان دریا، کە کۆمپانیای نەفت ئەبوزەبی نیشتمانی (ئەدنوک) راگەیان کە دوو لە کەشتییەیلی تۊش پەلاماریگ هاتنە لەوەخت رەدبۊنیان لە گەرووەگە.
