چوە کردیدە
مە را عشق تو گیان دامە تو بۊ را مە چوە کردیدە !؟
مە ڕا کیەرد تو سەر نامە ، تو بۊ را مە چوە کردیدە !؟
مە هەس ئۊشن فلانی عاشقە ، کوورە ، تڵە پا دەێگ
هە وەر نامە و هە گلیامە ، تو بۊ را مە چوە کردیدە !؟
لەبە پاچ قولەم دانە ، خڵ قەومەیل حەق دارد
لەبە کوشیام و بڕیامە ، تو بۊ را مە چوە کردیدە !؟
ئەنەخوەردۊم ئەوسا را ڕیەن ئێڵاخ داخەیلد
ئەلان دی هۊچ ، خوریامە ! تو بۊ ڕا مە چوە کردیدە !؟
کورە دی بەس بکە دونیا کەمە جارێ ، فرەێ ماگە
لە لاێ ئەێ ئوومەت عامە ، تو بۊ را مە چوە کردیدە !؟
مە کول چشتێ لە دەس دامە ، ئەلان دی هۊچ نەێرم جز
دڵێ لەی دار دونیامە ، تو بۊ را مە چوە کردیدە !؟
هە ئی ئاخر شەڕە گ دۊنی ، کەسێگۊ یەێ زەمان را خوەێ
مە گشتێ را تو دانامە ، تو بۊ ڕا مە چوە کردیدە !؟
فەقەت مق بردمەسەو دل کە ڕازم بەر مەڵا نەوگن
هە سازیم و هە سزیامە ، تو بۊ را مە چوە کردیدە !؟
تو کاج داێمی سەونز و مە ڕا تو چۊ چنارۊمە
هە زەردەو بۊم و ڕزیامە ، تو بۊ را مە چوە کردیدە !؟
مە چۊ کووتەێ قەساوۊمە ، لە ژێر باڵتەێ دەردد
لەشم پا تا وە سەر زامە ، تو بۊ را مە چوە کردیدە !؟
ت دەیشتەید و مە تەنیا دار بەرزێگد یە چل ساڵە
ئڕا تو لەورە چقیامە ، تو بۊ را مە چوە کردیدە !؟
وەرم کردیدە شار خەرنگەزێ تانەێ ڕەفیقەیلم
هزاران بار چزیامە ، تو بۊ را مە چوە کردیدە !؟
عەلی موحەممەد موحەممەدی
