دووپارچە شیعر
زندان تیەریک بێ دەرێگی ئەی عشق
یەێ مار ڕەنگین هەف سەرێگی ئەی عشق
تا تیەید، وە بێ مدوو خۊنێ نەیدەو
تا چید، چ ڕەنج بێ وەرێگی ئەی عشق
جارێگ بڵازە لە تەنۊرم نەچگە
ئاگر لە پەل مەس ئەنگۊرم نەچگە
یەێ شیشە ترەک لە ئەو شەراوە بڕشن
هێمانێ ناو خوەم لە هۊرم نەچگە
خوەم بۊمەسە هامشووکەر مەنزڵ خوەم
خوەم بۊمەسە شێت دڵەگەێ ئاقڵ خوەم
فێر م لە ناو ئی کەلیمەیلە مەکەن
شێعرێگ نەنۊسامە هناێ ڕا دڵ خوەم
سادق حوسەینی ئیلامی
پایزە، سەردە، زەلانە، شەوە
ئاڵەم سەراسەر کشمات خەوە
ئمشەو لە شانسم ئاسمان سایە
چۊ چلەی زمسان کەویەخێگ نایە
بەیداخ کوتایە شەو وەقینـــــەوە
کوچگ ڕچگیاس وە زەمینــــەوە
پــــەلوەچەیل وشک نزارێبردێ
سەر نان ئەو باوش وەڵنڰەیل مردێ
کــۊە بار تـــــــەم گرت وەکــووڵەوە
بوو کرد وە هناس دەیشتەی چووڵەوە
تا شـــــەو گریە داس دەسماڵ چــەوم
هیچوەخت لە خەوفا نیەوەیدەو خەوم
هەر وە دەم دێرە منیش بریامە
بزانی لە کام دەروەن خوریامە!
سەعید ئبادەتیان
