دۊاساڵان وه خوەم
کووس وابردێ دۊاساڵان وه خوەم
ئومر بەر باد چێ وه تاڵان وه خوەم
قسیەێ ناڕەواج ناو مەجلسەیلم
هاودەم و موونس مناڵان وە خوەم
ژار و سایەنشین پاێ دیوارانم
دڵسەرد له دیدار چەوکاڵان وه خوەم
عاجز لە زنەی رازێ وە مردن
لەو دۊره نیش ناو ماڵان وه خوەم
کاڵاێ ناڕەوای له بازار مەنه
دەس و دەس گەردی دەڵاڵان وه خوەم
بێ بەرگ و بێ بار بێ سایه و مایه
پەل پوو شکیای سەر یاڵان وه خوەم
وه هەر نزه واێگ شانم شکنیگ
ستەم دیدەێ دەس شەماڵان وه خوەم
هشکه وەڵنگ زەرد له داران کەفتێ
خشەی سمکوو پاێ غەزاڵان وه خوەم
پۊش و وەڵنگ واش لاو بەردەێ ڕووان
بەرد وە بەرد کەفتەێ گڵاڵان وه خوەم
جوور مەلان هەر شەو لانەم ها پەلێ
قوو کیش شەوار ئەڤداڵان وه خوەم
چەوەیلم تا سوو پاسەوانی کەن
گیرودە و ئەسیر خەیاڵان وه خوەم
هەرچگه فیشتر سیفاێ دەوران کەم
له کول کردەی ویش بەتاڵان وه خوەم
هەرکەس وە تەورێگ خوەنێ له گووشم
فەریب خوردەێ دەس دەجاڵان وه خودم
نووڕم وە یاران یەک یەک دان لە بار
چەوەڕێ ئزرائیل هەر ئەلان وە خوەم
ئاقبەت دونیا سان نووەشتەێگە
حەکاکی وەناو جەلیلیان وە خوەم
شەمسلا یە بەخت ئەقباڵ منە
بێ دەس بێ دەسڵات دۊاساڵان وەخوەم
شەمسلا جەلیلیان
دونیا بێ بنەو لە لێ کــەمەو نیەو
ئاوێ کە ڕشیا هـەرگز جەمەو نیەو
سانێ لە جێ خوەێ یەێ پل بخوەێدن
مەحاڵە لە نوو وە جی خوەێ باێدن
دڵێ کە شکیاس لە نوو وە دڵ نیەو
چەمەر وە جیگیر سازو دێوەڵ نیەو
قسیەگ وە ناحەق دەربچوو لە دڵ
دڵ پاچنێدن وێنەێ پـــــەڕەێ گوڵ
تیڕی لە چلەێ کـــەمان دەربچوو
ئاقەبەتێ کەس نیەزانێ چوە بوو
زەمان گوزەرێ ئمریش چودەسەر
نیەتێدەو ئمرێگ چیە وەهەێەر
هەرچێ فکڕەو کەم وەی دونیای فانی
دڵ وەکەس نێاس ئاقڵ خوەێ زانێ
دونیا تا وەسەر وەکـــــــــەس نیەمێنێ
یەێ خاسی و خراویێ لە دونیا مێنێ
خوەشاڵ وە هەرکە خەیربۊنێ سێنێ
نیکی بکـــــــــــــاریم هەر کە وە دینێ
سەفــــــەڕێ دونیا فـــڕە بێ وەفاس
تا ئــــەلان دیدە دڵ وە کــەسێ داس
دونیا مێنێدو خــــــــاس و خـڕاوێ
هەرکەس وە کەردەێ دەێدن جواوێ
ئەلیمیر سەفەری
