وەهار هیلێدەی جی.. نیمەی ئیران کەفتیەسە کەنار بیاوانبوین

شەفەق نيوز – تەهران - هەولێر 

ناوەند نیشتمانی کەشوهەوای ئیران، ئمڕوو شەممە، هوشداری دا لەو ئاڵشتبوین کەشوهەوا لە وڵاتەگەی، دیاری کرد کە ئیرنگە تاوسان ئیران لە چوار تا پەنج مانگ وەردەوامە، و ئەگەر گیرهاتن گەرمی وەردەوام بوی، نەک تەنیا وەهار لەدەس دەێد، بەڵکو نیمەی وڵات دی ئەرا داکاسیان نیەگونجێد.

    راپۆرتیگ وەلایەن ئاژانس میهر بڵاو کریا و ئاژانس شەفەق نیوز هەڵگەردانی کرد، لە زوان ئەحەد وەزیفە وەرپرس ناوەندەگە وت: ئەگەر ئەو سیناریۆی رەشبینە ئەرا ئاڵشتبوین کەشوهەوا وەجی هات و پلەی گەرمی تا 8 پلە بەرزەو بوی، خو فرەی لەو شارەیلە کە بڕن لە مەردم کەفنە کەنار بیاوانبوین، جویر یەزد و کرمان و ئەسفەهان، کە دی ئەرا داکاسیان نیەگونجن.

  وتیش: لە دەیەیل گوزەشتە، بەرزەوبوین پلەی گەرمی تاوسان لە ئیران لە مانگ تەممووزەو دەسوەپی کردیاد، وەلێ ئیرنگە لە ئایارەو دەسوەپی کەێد، و تا تشرین یەکەم وەردەوامە، وتیش: درویژیگ تاوسان لە ئیران بویەسە 4 تا 5 مانگ، و هەرچەنیگ ماوەین چگن لە وەرز سەردی ئەرا وەرز گەرمی کەمەو بوی، کە ئەوەیش وەهارە، کەمەو بوود.

    دیاری کرد کە ناوڕاس پلەی گەرمی لە ئیران زیاتر لە دوو پلەی سەدی لەی پەنجا ساڵ گوزەشتە بەرزەو بویە، کە لە ناوڕاس جیهانی بەرزترە، لە وەختیگ دەوڵەتەیل فرەیگ گامەیلیگ ئەرا کەمەوکردن تەکان کاربۆن جیوەجی کردن ئیران تا ئیسە ریکارەیل کارا وەرانوەر رێککەفتن پاریس جیوەجی نەکرد.

     لە دەسنشانکردن ئەرا زیایبوین هەڵم ئاو و خوازین وەکارهاوردنی، و شیواشیو شیوەیل واران، دیاری کرد کە ئەگەر پلەی گەرمی تا سێ پلە بەرزەو بوی ریژەی هەڵم وەڕیژەی 20 لەسەد بەرزەو بوود، لە وەختیگ سەرچەوەیل ئاو لە وڵاتەگە داوەزێد.

وتیش: چارەسەری ئەرا نواگیریکردن قەیران کەشوهەوا کەفێدە گەشەپیدان وزەیل نووەوبویە و نووەوکردن بەرهەم کارەبا و خاسەوکردن شیوەی وەکارهاوردن وزەس، وتیش: ئەگەر وریا نەویمن نەک تەنیا وەرز وەهار لەدەس دەیمنر بەڵکم ژیان لە نیمەی ئیرانیش فەوتێد.

 هەڵگەردان: ئاژانس شەفەق نیوز